Jańalyqtar

Mańǵystaýdaǵy sarbazdyń ólimi: aıyptalýshy oqty abaısyzda atqanyn málimdedi

19.01.2025

0 90

Foto: zakon.kz

Astanadaǵy qylmystyq ister jónindegi mamandandyrylǵan aýdanaralyq áskerı sotynda merzimdi sarbaz Marat Barqulovty óltirý isi boıynsha aıyptalǵan «Batys» óńirlik qolbasshylyǵynyń 25744 áskerı bólimi vzvodynyń eks-komandıri Damır Dosovtan jaýap alyndy, dep habarlaıdy qandastar.kz Zakon.kz-ke silteme jasap.

22 jastaǵy zenıttik-artıllerııalyq vzvodtyń eks-komandıri Damır Dosov 2024 jyldyń 7 qyrkúıeginde kezekshilikke túskenin málimdedi. Ol qarýdy qabyldap alǵanda maıor Baǵdat Maılıev tapanshanyń oqtaýly ekenin aıtpaǵan jáne nusqama júrgizbegen. Dosov qarýdy alyp, onyń bekitpesin bosatqanyn artynsha shertip, onda oq-dáriniń joqtyǵyna kóz jetkizgendigin alǵa tartady.

«Men kinámdi moıyndamaımyn, sebebi muny ádeıi istegen joqpyn. Shatyrǵa myltyqpen maqtanyp, ony ary-beri baǵyttap kirgen bolatynmyn, sol sátte abaısyzda shertpeni basyp qaldym. Bári oqystan boldy. О́zim túsinbesten birneshe sekýndqa qatyp qaldym. Barqulovpen araz bolmaǵanbyz. Ata-anasynan keshirim suraımyn»,- dedi Damır Dosov.Leıtenant ózi týraly Almatydan shyqqanyn, Radıoelektronıka jáne baılanys Áskerı-ınjenerlik ınstıtýtynda joǵary bilim alǵanyn aıtty. Vzvod komandıri laýazymyna qaıǵyly oqıǵadan biraz buryn ǵana taǵaıyndalǵan. Atasy Aýǵan soǵysynyń ardageri bolǵandyqtan osy salady qyzmet etýdi armandaǵan.

2024 jylǵy 7 qyrkúıekte Aqtaýdaǵy vzvod komandıri «Oımasha» polıgonynyń aýmaǵynda PM tabeldik tapanshasynan qatardaǵy jaýyngerge oq atqan. Saldarynan merzimdi sarbaz Marat Barqulov kóz jumdy. Buǵan deıin sot isinde oqıǵanyń qalaı bolǵandyǵyn merzimdi sarbaz Mahsym Dangarov aıtyp, kýálik etken bolatyn.

Ilmekter