Mańǵystaýlyq oqýshynyń ólimine qatysty is tergelýde

Foto: ashyq derekkóz

Mańǵystaý oblysy Beıneý aýdanyna qarasty Aqjigit aýylynda mektep oqýshysy Saǵyndyq Qurmanııazulynyń ólimine qatysty tergeý amaldary júrgizilip jatyr, dep habarlaıdy qandastar.kz

Qaıǵyly oqıǵa 2024 jylǵy 8 sáýirde oryn alǵan. Marqumnyń dostary men týystary bul jaǵdaıdyń uzaq ýaqyt boıy jasalǵan júıeli qorlyq pen kúsh kórsetý áreketteriniń saldary ekenin aıtyp otyr. Olardyń sózinshe, 20-21 jastaǵy jastar sońǵy úsh jyl boıy joǵary synyp oqýshylaryn óz sharýasyna jumsap, qoqan-loqy kórsetip kelgen. Saǵat 16:30 shamasynda jigitter oqýshylarǵa «qora tazalaýǵa kelińder» dep buıryq bergen. Buǵan deıin de olar oqýshylardy káriz tazalaý, qubyr jóndeý sııaqty jumystarǵa májbúrlep jumsaǵan.

Sol kúni kúdiktiler balalardy keshke taǵy shaqyryp, qatarǵa turǵyzyp, bir-birlep soqqy jasaǵan. Kýágerlerdiń aıtýynsha, Saǵyndyq Qurmanııazuly keýde tusynan bir ret soqqy alǵan soń, qyryldap, sol jerde jan tapsyrǵan. Qylmys temirjol astyndaǵy qarańǵy ótkelde jasalǵan. Kúdikti oqıǵa ornynan esh alańsyz ketip qalyp, keıin oqıǵaǵa qatysqan balalarǵa qysym kórsetip, shyndyqty jasyrýǵa májbúrlegen. Ol Saǵyndyqtyń ólimin «júrek talmasy» dep túsindirýdi talap etken.

Marqumnyń nemere aǵasy Sáken Qýanyshbekovtiń aıtýynsha, Saǵyndyq esinen tanǵan kezde kúdikti oǵan kómektesýdiń ornyna, «talyp jatyr, oıanady» dep mán bermegen. Sonymen qatar, aǵasy basty kúdiktiniń voleıbol jarysyna irikteý kezinde Saǵyndyqqa jol bermeı qalǵanyn aıtyp, bul baqtalastyq ta kúsh qoldanýǵa sebep bolǵanyn jetkizdi.

Alǵashqyda Saǵyndyqtyń ólimi júrek talmasynan boldy degen aqparat taraǵanymen, keıin dostary bolǵan jaıtty ashyq aıtyp, marqumnyń denesinde soqqy izderi bary anyqtalǵan. 12 sáýir kúni resmı aryz túsip, sol kúni kúdiktiler ustaldy. Qazirgi tańda negizgi kúdikti qamaýǵa alynǵan. Tergeý jalǵasýda, al aýyl turǵyndary ádil sheshim men eń qatań jazanyń qoldanylýyn talap etýde.