Қазақтың әйгілі әскери қолбасшысы Бауыржан Момышұлының туған күніне орай эстрада жұлдызы Толқын Забирова ерекше суреттермен бөлісіп, естелігін жазды, деп хабарлайды qandastar.kz порталы.
Суретте кішкентай әнші атақты батырдың алдында отыр.
«Бүгін – Бауыржан Момышұлы атамыздың туған күні. Аңызға айналған, ел рухының символы Ұлы Жеңіс батыры. Мен үшін бұл күн ерекше. Себебі бала күнімде – шамамен 7–8 жасымда – тағдыр маған сирек бұйыратын бір үлкен бақ сыйлаған. Ол Бауыржан атамыздың туған күніне қатысу мүмкіндігі. Бұл да әрине, менің нағашы әжемнің арқасы», — деп жазды әнші.
Айтуынша, әжесі – өте шығармашыл, мінезі берік, білімге құштар жан болған. Осындай қасиеттері үшін оны Бауыржан атамыздай ұлы тұлғалар ерекше құрметтейтін.
«Сол күн әлі есімде – үлкен зал, ұзын дастархан, айналасында елге белгілі азаматтар. Біз кірген сәтте Бауыржан атамыз орнынан тұрып, әжемді қарсы алып, қолынан ұстап, өзі отырған төрге дейін шығарып салды да, қасына отырғызды. Мен де әжемнің жанында отырдым. Әжемнің Бауыржан атаға арнап жазған өлеңі бар еді, соны сөмкесіне салып қоюымды өтінген болатын, бірақ бала көңілмен оны мен ұмытып кеткен едім. Сонда да әжем абдырап қалмады – өзінің терең білімі мен суырыпсалма талантының арқасында сол жерде-ақ жүректен шыққан жырын оқып берді. Залда отырғандардың бәрі қол соғып, риза болғаны әлі күнге дейін көз алдымда. Бүгін сол сәттерді үлкен сағынышпен еске аламын», — деп жазды Қазақстанның еңбек сіңірген қайраткері.
