Múftııat qazaqstandyqtarǵa úndeý jasady

Qazaqstan musylmandary dinı basqarmasy qurban shalýǵa aqsha jınaıtyn jalǵan servısterden saq bolýǵa shaqyrdy, dep habarlaıdy Qandastar.kz aqparat portaly.

QMDB qurban shalý rásimin ońaılatý jáne ádil uıymdastyrý maqsatynda qurban.muftyat.kz resmı onlaın platformasyn iske qosqan bolatyn. Bul saıt arqyly qurbandyq shalǵysy kelgen ár azamat qurbandyq malyn tańdap, qarajatty qaýipsiz túrde aýdara alady.

Qurban shalý rásimin ońaılatý úshin QMDB tarapynan jasalǵan ıgi bastamany teris maqsatta qoldanyp, túrli alaıaqtyq áreketteri oryn alýy yqtımal. Osy sebepti elimizdiń azamattaryn qorǵaý maqsatynda mańyzdy eskertý jasaımyz: Qurban aıt merekesi kezinde ózderiniń teris maqsattaryn júzege asyrý úshin keıbir belgisiz azamattar men uıymdar jalǵan qurbandyq saıttaryn ashyp, halyqty adastyryp, qurbandyqqa aýdarǵan qarajattaryn ózge maqsatqa paıdalanyp ketýi múmkin. Sondyqtan barshańyzdy abaı bolýǵa shaqyramyz, — dep jazylǵan QMDB habarlamasynda.

Qazaqstan musylmandary dinı basqarmasy tek senimdi resmı platforma arqyly qurbandyq shalýǵa shaqyrady.

Kúmándi saıttar men beımálim adamdardyń usynystarynan saq bolyńyzdar. Bul sizdiń qarajatyńyz ben nıetińizdiń qaýipsizdigin qamtamasyz etýdiń basty joly. Alla Taǵala barshańyzdyń qurbandyqtaryńyzdy qabyl etip, izgi nıetterińizdi arttyrsyn!, — delingen habarlamada.