Наразы топ: Жалғыз баспанадан айрылғалы тұрмыз, «Forte Bank» төрағасы Бекжан Пірматов отставкаға кетсін

Фото: forbes.kz

Видео: https://www.facebook.com/share/v/DtSvgUMeK2ZDs6cz/?mibextid=Ly78Ri&startTimeMs=2000

Ипотекалық несие алушылар мен мүгедектерден құралған бастамашыл топ «Forte Bank»-тың әрекетсіздігіне шағымданып, Басқарма төрағасы Бекжан Пірматовтың отставкаға кетуін талап етуде, – деп хабарлайды qandastar.kz.

Бейнежазбада көрсетілгендей, наразы топ банк соңғы уақыттары жұмыс тобының шешімі бойынша несиелерді қаржыландырудан және қайта қаржыландырудан бас тартып отырғанын, бұл өз кезегінде қоғамдағы экономикалық тұрақсыздыққа әкелетінін айтады. Оның үстіне қазір «Forte Bank»-тың рейтингі де бұрынғыдай шарықтап тұрған жоқ делінеді бейнежазбада.

«2015 жылы «Forte Bank»-ке ең көп қаржы құйылды. Ал, сол миллиардтар қазір қайда? СУСН санатындағы қарыз алушылар үшін 2/1 бөлімі бойынша борыштық жүктемені азайтуға бағытталған ақша қайда? Мемлекеттiк бағдарлама басқарма төрағасының қалауымен тыста қала ма? Біздің жалғыз баспанадан айырылып қалу қаупiміз бар.

Қаржы нарығын реттеу және дамыту агенттігінің төрайымы Мәдина Әбілқасымоваға бұл мәселенің мән-жайын жеткіздік, банкке бұл түйткілді шешуді тапсырды. Алайда нәтиже жоқ. 37 адам араша күтеміз, Президенттен, жауапты орындардан үміт күтеміз, соттан да тайынбаймыз. Ашықтықтан алшақ «Forte Bank»-ке, кездесуден, әркез талқылаудан қашқан Бекжан Пірматовқа деген өкпеміз қара қазандай. Әлеуметтік желіге шығып, әуре болып отырғанымыздан да содан», – дейді бейнежазба авторы.