«وزدەرىڭ تازالاڭدار!»: استانادا جاستار قۇرىلىس كومپانياسىنىڭ قوقىسىن ءوز كەڭسەسىنە اپارىپ تاستادى

استاناداعى رۇقسات ەتىلمەگەن قوقىس الاڭدارىنا قاتىستى ماسەلە قوعامدىق رەزونانس تۋدىردى, دەپ جازدى Qandastar.kz.

بەلسەندىلەر «نۇر استانا قۇرىلىس» كومپانياسىنىڭ ارەكەتسىزدىگىنە قارسى نارازىلىق ءبىلدىرىپ, قوقىستى تىكەلەي كومپانيا كەڭسەسىنە جەتكىزدى.

قالالىق اكىمدىكتىڭ رەسمي مالىمەتىنشە, بيىل ەلوردا بويىنشا 5 اۋداننان 45 مىڭ تونناعا جۋىق قوقىس شىعارىلعان. الايدا ۇلى دالا مەن تۇران داڭعىلدارىنىڭ قيىلىسىنداعى 8,6 گەكتارلىق قوقىس الاڭى ءالى كۇنگە دەيىن نازاردان تىس قالىپ وتىر. سپۋتنيكتەن دە كورىنەتىن بۇل ۇيىندىلەر ۇزاق ۋاقىت بويى جيناقتالعان.

اتالعان اۋماق ءۇشىن جاۋاپتى قۇرىلىس مەكەمەسى – «نۇر استانا قۇرىلىس» كومپانياسى.

ەكولوگيانى قورعاۋ مەن قالا تۇرعىندارىنىڭ جايلىلىعى تۋرالى رەسمي ۋادەلەرىنە قاراماستان, كومپانيا نىساندارىنىڭ جانىندا قوقىس ۇيىندىلەرى ءجيى كەزدەسەدى.

بەلسەندىلەر بۇل ارەكەتسىزدىككە نازار اۋدارتۋ ماقساتىندا ەرەكشە قادامعا باردى: ولار قوقىس قالدىقتارىن كومپانيا كەڭسەسىنە ۆەلوسيپەدپەن جەتكىزدى.

«NAK-تىڭ قوقىسى – NAK كەڭسەسىنە. ءوز قوقىس الاڭدارىڭدى وزدەرىڭ تازالاڭدار!» دەگەن ۇرانمەن ۇيىمداستىرىلعان بۇل شارا قالا ەكولوگياسى ءۇشىن جاۋاپكەرشىلىك الۋدىڭ ماڭىزىن كورسەتتى.

قوقىس جەتكىزۋ كەزىندە بەلسەندىلەر مەن كومپانيانىڭ باسقارۋشىسى سەرىكجان مۇحتاروۆ اراسىندا ديالوگ ءوتتى.

وقيعا ورنىنا قۇقىق قورعاۋ ورگاندارى كەلىپ, ءمان-جايدى انىقتادى. دەگەنمەن, «جاڭا ادامدار» قوزعالىسىنىڭ وكىلدەرى كومپانيادان ناقتى جاۋاپ الا الدى – قوقىس الاڭىن جويۋ 2025 جىلدىڭ قازانىنا جوسپارلانىپ وتىر.

Antitrash باستاماسىنىڭ قاتىسۋشىلارى «نۇر استانا قۇرىلىس» كومپانياسىن ءوز ۋادەلەرىنە ساي ارەكەت ەتىپ, ەكولوگياعا قاتىستى ۇرانداردىڭ بوس ءسوز ەمەس, ناقتى ىسپەن دالەلدەنۋىن تالاپ ەتۋدە.