Pavlodar oblysynda jetimderge tıesili páterde ákimniń orynbasary turǵan

Foto: pexel

Pavlodar oblysynda basshylyq Ertis aýdany ákiminiń jańadan taǵaıyndalǵan orynbasaryna jetim balaǵa tıesili páterdi berý týraly sheshimdi qabyldaǵan, dep habarlaıdy qandastar.kz

Roza Aqanova 2025 jyldyń aqpan aıynda Ertis aýdany ákiminiń orynbasary bolyp taǵaıyndaldy. Buǵan deıin ol uzaq ýaqyt Pavlodar oblysynyń bilim basqarmasy basshysynyń orynbasary bolyp qyzmet atqarǵan.

Jańa laýazymdy eskere otyryp, ol kóship, baspana tabý kerek boldy.

“Halyqtyń áleýmettik osal tobyna jatpaıtyn tulǵalarǵa zańsyz turǵyn úı berý faktileri anyqtaldy. Máselen Ertis aýyly, Mútkenov kóshesi, 32-úı, 10-páter mekenjaıy boıynsha halyqtyń áleýmettik osal toptaryn qamtamasyz etýge arnalǵan páterde aýdan ákiminiń orynbasary Roza Qabıbolqyzy Aqanova turady”, – dedi prokýror ádep jónindegi keńeste.

Skifnews.kzaqparat portaly jazǵandaı,   prokýratýra buǵan deıin de baspananyń tıesili adamdarǵa berilmegenin anyqtady. Sondaı-aq bos turǵan 14 páter bar, biraq belgili sebeptermen sheneýnikter ony halyqtyń áleýmettik osal toptaryna berý boıynsha jumys júrgizbeı jatyr.

Basqarma basshysy ádep keńesinde eshteńeni joqqa shyǵarǵan joq. Ol sheshimdi óz betinshe qabyldaǵanyn aıtyp, páter kiltin aýdan ákiminiń orynbasaryna ózi tabystady.

“Onda jetim balalar jaldaý shartymen turady. Baspanova degen adam bar. Biraq onyń bul úıde turmaǵanyna bir jyldan asyp ketkenin baıqaımyz. Sóıtsem, barlyq kommýnaldyq esep, páter aqysy bosqa tólenip jatyr eken. Ári aýdanda turǵyn úı bolmaǵandyqtan, kiltti ýaqytsha Aqanova Roza Qabıbolqyzyna berýdi jón kórdim”, – dedi Ertis aýdandyq ekonomıka bóliminiń naqty sektorynyń basshysy Qaırolla Eleýkenov.

Ádep jónindegi keńes músheleri zańǵa sáıkes áreket etý keregin, alaıda ákim orynbasarynyń páterde kóp turmaıtynyn eskerip, osyǵan baılanysty laýazymdy tulǵaǵa qyzmettik talaptardy tolyq oryndamaǵany týraly eskertý túrindegi tártiptik jaza qoldanýdy usyndy.