Prezıdent: Kásipkerlerge kedergi bolmaý kerek

Foto: Aqorda

Qasym-Jomart Toqaev kásipkerlermen kezdesý barysynda memleket pen bıznes arasyndaǵy qarym-qatynasty ıfrlandyrý ózekti ekenine de nazar aýdardy, dep jazady qandastar.kz

Prezıdenttiń aıtýynsha, bul – bıznestiń naryqtaǵy básekege qabilettiligin arttyrýdyń eń tıimdi joly. Al memleket úshin basy artyq bıýrokratııany qysqartatyn, jemqorlyq táýekelderiniń aldyn alyp, jalpy tıimdilikti jaqsartatyn mańyzdy qadam.

Memleket basshysy sózin qorytyndylaı kele, byltyr kóktemde bolǵan sý tasqyny kezinde qarjylaı qoldaý kórsetken barsha kásipkerlerge, sondaı-aq «Qazaqstan halqyna» qoryna jarna salǵan bıznes ókilderine alǵys aıtty. Qor qarjysy densaýlyq jáne bilim berý salalaryndaǵy ózekti áleýmettik mindetterdi sheshýge jumsalyp jatyr.

– Búgin ashyq ári paıdaly áńgime boldy. Sóz sońynda qaıtalap aıtqym keledi: memleket elimizdiń óndirisine qarjy salatyn, turaqty jumys oryndaryn ashatyn adal kásipkerlerdi árdaıym qoldaıdy. Bárińizdi jaqsy tanımyn. Sońǵy úsh jylda memleket pen bıznes arasyndaǵy yqpaldastyq pen ózara túsinistik aıtarlyqtaı nyǵaıǵanyn kórip otyrmyz. Memleketke paıdamdy tıgizsem degen otanshyldyq ustanymdaryńyzdy joǵary baǵalaımyn. Biz reformalar jolyna tústik. Elimizde júrgizilip jatqan saıası, áleýmettik-ekonomıkalyq ózgerister bizdiń aımaqta buryn-sońdy bolmaǵan. Halyq qoldamasa, bul reformalar iske aspas edi. Qazaqstannyń ekonomıkalyq áleýetin nyǵaıtýǵa baǵyttalǵan strategııamdy bıznes qoǵamdastyqtyń qýattaǵanyn aıryqsha atap ótkim keledi. Úkimet nemese quqyq qorǵaý organdary arqyly memleket kásipkerlerdiń zańdy qyzmetine eshqandaı kedergi keltirmeýge tıis. Bul – meniń myzǵymas ustanymym, – dedi Qasym-Jomart Toqaev.