Ресей Қазақстанның «шетел агенттері» туралы заң жобасына араласа ма?

Фото:gov.kz

Мәжіліс депутаты Ирина Смирнова шетелдік агенттер туралы заң жобасына Ресейдің әділет министрлігі қатысады деген журналистің сөзін жоққа шығарды, деп хабарлайды qandastar.kz

Журналист Ардақ Бөкеева өзінің Facebook парақшасында шетелдік агенттер туралы заңға Ресейдің әділет министрлігі кірісетінін жазған болатын.

«Депутат Ирина Смирнова талап еткен шетелдік агенттер туралы заң бойынша жұмыстар жүріп жатыр және бұл заңды әзірлеуге Ресейдің әділет министрлігі де атсалысады. Олар белсенді түрде кеңес береді. Яғни, 2026 жылы ақпараттық кеңес пен адам құқығына қатысты жағдайды топшылай беруге болады. Биыл бұл заңды қабылдауға уақыт болмай қалса деген үмітім бар» деп жазды журналист.

Orda.kz. тілшісі осы жазылған ақпаратқа қатысты Ирина Смирнованың өзіне хабарласып, жауап алды. Депутат журналистің берген ақпаратын жоққа шығарды.

«Ондай ештеңе жоқ. Құрылтайда президент Үкіметтік емес ұйымдар туралы заң жобасын әзірлеуді ұсынды. Бәлкім Ақпараттық агенттік туралы заң болмайтын шығар, бірақ түзетулер болады. Бірдеңе айтуға әлі ерте, сосын біз қандай да бір заңды түзетуге ешкімді араластырмаймыз. Әсіресе шетелдіктерді қоспаймыз», – деп жауап берді Смирнова.

Еске сала кетсек, мәжіліс депутаты Ирина Смирнова «шетел агенті» туралы заң  дайындауды ұсынды.