Фото: Жетісу ФК
Талдықорғандық «Жетісу» командасының бас бапкері Самат Смақов «Қайрат» клубының жас қақпашысы Шерхан Қалмырза туралы пікір білдіріп, жас футболшыларға артылатын қоғамдық қысымның зияны жайлы айтты, деп жазды qandastar.kz
Бапкердің айтуынша, ол Шерханмен жиі сөйлесіп, ағалық кеңес беріп тұруға тырысады.
«Шерхан Қалмырза — болашағынан үміт күттіретін жас қақпашы. Бірақ дәл қазір оның бастысы — тыныш жұмыс істеу. Сол себепті мен оған баспасөзбен байланысқа шықпауға, телебағдарламаларға қатыспауға кеңес бердім. Жас спортшыларға шамадан тыс көңіл бөлінуі оларды тұншықтырып жібереді», — деді Самат Смақов.
Смақов Еркебұлан Сейдахметтің мансабын мысалға келтіріп, ақпарат құралдарының шамадан тыс назарынан оның шынайы мүмкіндігі ашылмай қалғанын еске салды.
«Еркебұлан «Уфаға» ауысқан кезде оны айналадан тыныштықсыз қалдырмады. Күнделікті тұрмыстық әрекеттерінің өзі жаңалыққа айналып кетті: «Еркебұлан дүкенге барды», «Еркебұлан сусын сатып алды» деген сияқты. Мұндай жағдайда жас ойыншының дамуына кедергі келері сөзсіз. Соңында біз бір таланттан айырылып қалдық», — деді ол.
Бапкер қазіргі таңда жас буынға артық мақтаудан бұрын, шынайы қолдау қажет екенін атап өтті.