Мерзімді қызметке шақырылған 21,9 мың қазақстандық сарбаздың 19,2 мыңы несие төлемдерін кейінге қалдыру жеңілдігіне ие болған. Кейінге қалдырудың жалпы сомасы 8,5 млрд теңгені құрады, деп хабарлайды qandastar.kz
Қазақстан Қарулы Күштерінде мерзімді әскери қызмет атқарып жүрген азаматтар 2024 жылдан бастап банктер мен микроқаржы ұйымдары алдындағы қарыздарын уақытша төлемей тұру құқығына ие болды. Бұл жеңілдік сарбаздардың әлеуметтік жүктемесін азайтып, олардың қызметін алаңсыз орындауына мүмкіндік беруді мақсат етеді.
Қолданыстағы қағидаларға сәйкес, төлемдерді кейінге қалдыру әскери қызметтің толық мерзімін және демобилизациядан кейінгі 60 күнді қамтиды. Осы кезеңде қарызға пайыз, айыппұл немесе өсімпұл есептелмейді. Бұл талап негізгі борышқа да, сыйақыға да қолданылады.
Бұл тәртіп сарбаздардан ешқандай өтінішті талап етпейді. Әскерге шақыру туралы мәліметті ҚР Қорғаныс министрлігі кредиттік бюроға жолдайды, ал қаржы ұйымдары бұл ақпаратты алған соң 15 күн ішінде азаматтың қарыздарына кейінге қалдыру енгізуге міндетті. Хабарлама онлайн немесе жазбаша түрде беріледі, банкке бару немесе қосымша келісімге қол қою қажет емес.
Кейінге қалдыру кезеңінде банктердің айыппұл қосуына, өсімпұл есептеуіне және қарызды өндіріп алу шараларын қолдануына тыйым салынады. Егер әскери қызметші бөлім тізімінен мерзімінен бұрын шығарылса, жеңілдік тағы 60 күн бойы сақталады.
Дегенмен, кейінге қалдыру барлық жағдайда берілмейді. Егер қарыз бойынша сот шешімі шығарылған болса, татуласу келісімі жасалса немесе атқарушылық жазба рәсімделген жағдайда жеңілдік қолданылмайды. Автоматты түрде енгізілмеген жағдайда әскери қызметші банкке жазбаша өтініш бере алады. Мәселе шешімін таппаса, қаржы омбудсманына немесе Қаржы нарығын реттеу және дамыту агенттігіне жүгіну мүмкіндігі бар.
Мамандардың айтуынша, бұл өзгеріс әскери қызмет өткеру кезеңінде қаржылық қысымды азайтуға және әлеуметтік тұрақтылықты қамтамасыз етуге бағытталған.
