Семейде оқушыны соққыға жыққан балалардың ата-аналары жауапкершілікке тартылды

Фото: ашық дереккөз

Желіде қатарласын соққыға жыққан оқушылардың видеосы тараған еді. Абай облыстық полиция департаменті аталған факт бойынша қылмыстық іс қозғағанын мәлімдеді, деп жазды qandastar.kz

“Қақтығысқа қатысушылар анықталып, ата-аналарымен бірге полиция бөліміне жеткізілді. Жасөспірімдер полиция бөлімінің есебіне қойылады. Олардың тәртібін кәмелетке толмағандардың құқықтарын қорғау жөніндегі облыстық комиссия қарайды. Тергеу барысы Абай облысы полиция департаменті басшылығының ерекше бақылауында. Ата-аналар балаларының тәрбиесі бойынша міндеттерін тиісінше орындамағаны үшін жауапкершілікке тартылады”, – деп мәлімдеді Абай облыстық ПД.

 Stan.kz ақпарат агенттігі хабарлағандай,   оқу орнының әкімшілігіне оқиғаның орын алуына ықпал еткен себептер мен жағдайларды жою туралы ұсыныс енгіздік дейді. Ал жәбірленушіге арнайы орталықта мамандар көмек береді.

“Психологтар мен бала құқықтары жөніндегі уәкіл оған қажетті қолдау көрсетіп, оқиғадан кейінгі эмоциялық әсерлерді жеңуге көмектесіп жатыр. Білікті мамандар жасөспірімнің психологиялық жағдайын қалпына келтіру үшін жұмыс жүргізіп жатыр”, – делінген хабарламада.

Оқиғаға қатысы бар жасөспірімдерге қатысты тиісті шаралар қабылданбақ. Кәмелетке толмағандардың құқықтарын қорғау жөніндегі облыстық комиссияның отырысы өтіп, онда әрбір қатысушының әрекеті жеке қаралады екен.

Еске салсақ, Семейде бір топ оқушы қатарластарын аяусыз ұрып-соққан еді.