«سترەسس العان»: اقىن سارا توقتامىسوۆا ارىپتەستەرى تۋرالى ايتتى

ايتىسكەر سارا توقتامىسوۆا «DINARA SATZHAN / دينارا ساتجان» youtube-ارناسىندا اقىنداردىڭ ايتىسقا قاتىسقاننان اۋرۋ بولىپ جاتقانىن ايتتى, دەپ حابارلايدى Qandastar.kz.

ونىڭ ايتۋىنشا, ايتىس ونەرى ادامدى كۇيزەلىسكە تۇسىرەدى.

«ايتىس دەگەن وتە قيىن ونەر. 20 مينۋتتىڭ ىشىندە ءوزىڭ سۋىرىپسالاسىڭ, قارسىلاسىڭ نە ايتاتىنىن بىلمەيسىڭ, سەن وعان جاۋاپ بەرۋىڭ كەرەك. ايتىستىڭ بەلگىلى تاقىرىبى بولادى, ول تۋرالى ايتۋىڭ كەرەك. ونىڭ ۇستىنە سەن ءارتىس بولۋىڭ كەرەك.

قازىر اقىن اعا-اپالارىمىز قانتپەن, قان قىسىمىمەن اۋىرادى. ونىڭ ءبارى نەدەن? ونىڭ ءبارى جاس كۇنىندە ايتىسقا قاتىسىپ, سترەسس العاننان. مەنىڭ ايتىستىڭ الدىندا كوزىم قىپ-قىزىل بولىپ كەتەتىن. ءسوزدىڭ سوققىسىنا دايىن بولۋ ءۇشىن بار ويىڭ سوندا بولادى. سەنى قارسىلاسىڭ ايامايدى», — دەدى ول.

اقىن ايتىس ونەرى قوعامدا ءوزىنىڭ ءتيىستى باعاسىن الا الماي ءجۇر دەپ ەسەپتەيدى.