қандастар Archives - QANDASTAR.KZ

Қазақстанға оралған қандастарға көрсетілетін мемлекеттік қолдау

Бақытжан Мұса — Wed, 18 Mar 2026 04:37:59 +0000

2026 жылдың басынан бері Қазақстанға 3,3 мыңнан астам этникалық қазақ көшіп келіп, қандас мәртебесін алды. Мемлекет оларды қолдауды жалғастырып, көшу, баспана және жұмысқа орналасу бойынша қаржылай көмек көрсетуде. Сонымен қатар тұрғын үй сатып алуға 7 миллион теңгеге дейін қаражат беріледі.

Жалпы алғанда, 1991 жылдан бері тарихи отанына 1 млн 168,2 мың этникалық қазақ оралған.

Биыл келген қандастардың басым бөлігі: – 47,8% Қытайдан,

– 43,6% Өзбекстаннан,

– 2,7% Түрікменстаннан,

– 2% Ресейден,

– 2,2% Моңғолиядан,

– 1,7% басқа елдерден келген.

2025 жылғы дерек бойынша, қандастардың 58,1%-ы еңбекке қабілетті жаста, 33,1%-ы кәмелетке толмағандар, ал 8,8%-ы зейнеткерлер.

Еңбекке жарамды азаматтардың білім деңгейі әртүрлі: 13,1%-ы жоғары білімді, 27,1%-ы орта кәсіби білім алған, 51,9%-ы жалпы орта білімді, ал 7,9%-ының білімі жоқ.

Қоныс аударғандар еліміздің әртүрлі өңірлеріне орналастырылған. Еңбек күші тапшы аймақтар ретінде Ақмола, Абай, Қостанай, Павлодар, Атырау, Батыс, Шығыс және Солтүстік Қазақстан облыстары белгіленген.

2026 жылға осы өңірлер бойынша қандастарды қабылдау квотасы 2 281 адамды құрайды. Ал жылдың алғашқы екі айында бұл аймақтарға 569 адам қоныстанды.

Бұл өңірлерге көшкен қандастарға мемлекеттік қолдау көрсетіледі. Атап айтқанда, көшуге бір реттік субсидия ретінде отағасына және әр отбасы мүшесіне 70 АЕК (шамамен 302,8 мың теңге) төленеді. Сонымен қатар бір жыл бойы тұрғын үй жалдау мен коммуналдық қызметтерге 15-тен 30 АЕК-ке дейін (64,9–129,8 мың теңге) өтемақы беріледі.

Жыл басынан бері 139 қандасқа түрлі көмек көрсетіліп, олардың 108-і тұрақты жұмысқа орналасқан.

Бұдан бөлек, ерікті қоныс аударуды ынталандыру мақсатында солтүстік өңірлерге жұмыс берушілерді тарту шаралары қолға алынған. Тұрғын үй сатып алу үшін 1 625 АЕК көлемінде немесе бір отбасыға 7 миллион теңге ге дейін өтеусіз берілетін экономикалық мобильділік сертификаты енгізілді.

АҚПАРАТ ZAKON.KZ САЙТЫНАН АЛЫНҒАН.

The post Қазақстанға оралған қандастарға көрсетілетін мемлекеттік қолдау appeared first on QANDASTAR.KZ.

Өміртай Бітімов: Қандастарды бөлмей, арнайы бағдарламамен елге әкелу керек

tursynhan — Mon, 02 Mar 2026 07:54:30 +0000

Қазақстанның Ауғанстандағы бұрынғы Төтенше және Өкілетті Елшісі, генерал-майор Өміртай Бітімов «QASQA JOL» YouTube жобасына берген сұхбатында шетелдегі этникалық қазақтардың тарихи Отанына көшу мәселесіне қатысты ойын айтты, деп хабарлайды QANDASTAR ақпараттық агенттігі.

Оның сөзінше, тәуелсіздікке қол жеткізгеннен кейін шетелдегі қазақтардың елге оралуға деген ниеті күшейе түсті. Бұған ел ішіндегі қоғамдық-саяси өзгерістер әсер еткен.

Бітімов Ауғанстандағы жағдайға тоқталып, әсіресе қыз балалардың білім алу және еркін өмір сүру мүмкіндігі шектеулі екенін жеткізді. Осыған байланысты Ауғанстаннан келетін қандастарды алаламай, қоғамға бейімдеп, ортаға сіңіру қажет екенін айтты. Оның пікірінше, оларды тарихи Отанына көшіру үшін арнайы мемлекеттік бағдарлама қажет. Сонымен қатар Иран мен Ауғанстаннан келген қазақтарды «радикал» деп қабылдау — негізсіз көзқарас екенін атап өтті.

Сондай-ақ ол Қытайдан көшіп келген этникалық қазақтар мәселесіне де тоқталды. Азаматтық беру процесін кезең-кезеңімен жүргізіп, алдымен тұрақты тұруға рұқсат беріп, бейімдеу жұмыстарын жүргізу дұрыс екенін айтты. Бітімов қазіргі таңда Қытай тарапынан тікелей қауіп бар деп айтуға негіз жоқ екенін, керісінше, Қытайдың технологиялық және экономикалық тұрғыдан қарқынды дамып келе жатқан ірі держава екенін атап өтті. Оның пікірінше, бүгінгі геосаяси жағдайда Қытаймен тығыз байланыс орнату маңызды әрі одан үйренер тұстар көп.

The post Өміртай Бітімов: Қандастарды бөлмей, арнайы бағдарламамен елге әкелу керек appeared first on QANDASTAR.KZ.

Сенат қандастарға қатысты маңызды құжатты мақұлдады

bahitzhanabzal — Fri, 23 Jan 2026 05:12:12 +0000

Сенаттың жалпы отырысында «Қазақстан Үкіметі мен Моңғолия Үкіметі арасындағы зейнетақы саласындағы ынтымақтастық туралы келісімді ратификациялау туралы» Заң мақұлданды. Бұл туралы Qandastar.kz порталы Іnform.kz сайтына сілтеме жасап хабарлайды.

Қазақстан мен Моңғолия арасында зейнетақымен қамсыздандыру саласындағы екіжақты ынтымақтастықты жандандыруға бағыталған келісімге Мемлекет басшысының 2024 жылғы 29 қазанда Моңғолияға ресми сапары аясында Ұлан-Батыр қаласында қол қойылды.

— Қаралып отырған заң – осы халықаралық келісімді ратификациялауды көздейді. Келісімнің мақсаты – адамдарға зейнетақы төлемдерін тағайындау саласындағы құқықтық қатынастарды реттеу. Атап айтқанда, ынтымақты зейнетақы саласында еңбек өтілін өзара тану, сондай-ақ әскери қызмет өткеру кезеңдері мен жоғары және орта арнаулы білім беру ұйымдарында оқу уақытын еңбек өтіліне есепке алу тетіктері қарастырылады. Мұнымен қоса, Келісіммен Қазақстан мен Моңғолия арасында жинақтаушы зейнетақы экспорты бойынша ынтымақтастықтың жаңа формасы көзделіп отыр. Бұл азаматтардың зейнетақы жинақтарын басқа мемлекеттің аумағында пайдалану мүмкіндігін қамтамасыз етуге бағытталған, — деді сенатор Амангелді Есбай.

Оның айтуынша, осы құжат аясында зейнетақы төлемдерін тағайындау үшін екі елдің аумағында жинақталған еңбек өтілін растау тәртібі бекітіледі. Бұл өз кезегінде азаматтардың әлеуметтік құқықтарын қорғау тұрғысынан маңызды қадам саналады. Келісім аясында уәкілетті органдар ретінде Қазақстан тарапынан Еңбек және халықты әлеуметтік қорғау министрлігі, Моңғолия жағынан Отбасы, еңбек, және әлеуметтік қорғау министрлігі айқындалған. Құжатты ратификациялау екі ел азаматтарының зейнетақымен қамсыздандыру саласындағы құқықтарын қамтамасыз етіп, Қазақстан мен Моңғолия азаматтарының көшу немесе тұрақты тұру жағдайында еңбек өтілін тануға және есепке алуға мүмкіндіктер береді.

Өз кезегінде сенатор Алтынбек Нухұлы бұл құжат қандастар үшін нақты әлеуметтік қолдау көрсетуге мүмкіндік беретінін айтты.

— Мәселен, Ішкі істер министрлігінің мәліметіне сәйкес, былтырғы 1 қазандағы жағдай бойынша Моңғолиядан Қазақстанға тұрақты тұруға 6654 азамат көшкен, оның ішінде 6109-ы қандас ретінде тіркелді. Еңбек және халықты әлеуметтік қорғау министрлігінің деректері бойынша 1800 азаматқа зейнетақы төлемдері тағайындалған. Осы Келісім күшіне енген кезде, осындай 400-ге жуық азаматқа еңбек өтілін қайта есептеу және зейнетақы төлемдерін қайта қарастыру жоспарланған. Сондай-ақ, бұл құжат Моңғолия аумағында өмір сүріп жатқан немесе жұмыс істеген Қазақстан азаматтары үшін де нақты қолдау болмақ, — деді А. Нухұлы.

The post Сенат қандастарға қатысты маңызды құжатты мақұлдады appeared first on QANDASTAR.KZ.

Министр ықтияр хат алғысы келетін этникалық қазақтардың іріктеуден өтетінін айтты

bahitzhanabzal — Fri, 09 Jan 2026 06:18:32 +0000

Мәдениет және ақпарат министрі Аида Балаева 2030 жылға дейінгі Көші-қон саясаты тұжырымдамасының негізгі талаптарын түсіндірді. Бұл туралы Qandastar.kz ақпарат порталы Instagram желісіндегі Bairaq_media парақшасына сілтеме жасап хабарлайды.

Министрдің айтуынша, саясаттың басты қағидаты – «Заң және Тәртіп». Көші-қон талаптары мигранттарға да, жұмыс берушілерге де бірдей қолданылады.

2026 жылғы қаңтардан бастап ықтиярхат алғысы келетін шетел азаматтары, соның ішінде этникалық қазақтар, алдын ала іріктеуден өтеді. Оған тіл білу тесті, сауалнама, тексерулер және әңгімелесу кіреді.

Мемлекеттік қолдау алу үшін қандастар еңбек күші тапшы өңірлерге қоныстанып, 5 жылдық әлеуметтік келісімшарт жасайды. Ал қолдаусыз тұрақты тұруға рұқсат алатындар өңірді өз қалауынша таңдай алады.

The post Министр ықтияр хат алғысы келетін этникалық қазақтардың іріктеуден өтетінін айтты appeared first on QANDASTAR.KZ.

Президент қандастардың елге оралуын қолдайтынын айтты

bahitzhanabzal — Mon, 05 Jan 2026 04:56:21 +0000

Президент Қасым-Жомарт Тоқаев Turkistan газетіне берген көлемді сұхбатында көші-қон мәселесіне қатысты пікір білдірді, деп хабарлайды Qandastar.kz ақпарат порталы.

Мемлекет басшысы қандастардың тарихи Отанына оралуын қолдайтынын атап өтті. Алайда олардың қазақстандық қоғамға бейімделу мәселесіне де ерекше назар аудару қажеттігін айтты.

«Өткен жылы Қазақстанға 16 мыңнан астам қандас келді. Олардың еңбекке қабілетті бөлігінің небәрі 15 пайызы ғана жоғары білімді. Осы себепті көпшілігі еліміздің әлеуметтік-экономикалық жағдайына бейімделуде қиындықтарға тап болып отыр. Қандастар негізінен Алматы облысының халқы тығыз орналасқан аудандары мен елді мекендеріне, сондай-ақ Маңғыстау облысындағы Жаңаөзен қаласына қоныстануда. Бұл жайтқа орталық және жергілікті билік органдары, соның ішінде құқық қорғау құрылымдары назар аударуға мәжбүр», – деді Қасым-Жомарт Тоқаев.

Президент өткен жылғы сұхбатында айтқан пікірін еске салып, Қазақстанда заң алдында барша азаматтың тең екенін баса айтты.

«Бұл жерде ешқандай ерекшелік те, артықшылық та болмауы тиіс. Біз өркениетті әрі әділетті мемлекет құрып жатырмыз. Бұл мақсатқа тек заңның үстемдігі, сапалы білім, жоғары мінез-құлық мәдениеті, еңбекқорлық, тәртіп және мемлекеттік рәміздерді құрметтеу арқылы ғана қол жеткізуге болады. Елдің болашағы – дарынды, бастамашыл әрі отаншыл жастардың қолында. Мемлекет басшысы ретінде олардың айрықша миссиясына әрдайым сенім артамын», – деп түйіндеді Қасым-Жомарт Тоқаев.

The post Президент қандастардың елге оралуын қолдайтынын айтты appeared first on QANDASTAR.KZ.

Шетелде еңбек етіп жүрген қазақ ғалымдары Астанада бас қосты

bahitzhanabzal — Fri, 21 Nov 2025 11:05:57 +0000

Астанада «Отандастар қоры» КЕАҚ ұйымдастыруымен отандық және шетелдік ғылыми диаспораны біріктіретін «Отандастар ғалымдар форумы» өтті. Шараның мақсаты – шетелде еңбек етіп жүрген қазақ ғалымдарының тәжірибесін елдің ғылымы мен инновациялық дамуына тарту, деп жазады qandastar.kz

Форум барысында ҚР Сыртқы істер министрлігінің Халықаралық ақпарат комитетінің төрағасы Айбек Смадияров мемлекеттің шетелдегі ғалымдарға беретін қолдауы туралы айтты.

– Мемлекет басшысы Қасым-Жомарт Тоқаев өткен жылғы Ғылым және технологиялар жөніндегі ұлттық кеңесте шетелдегі отандас ғалымдардың еліміздің дамуына қосатын үлесін ерекше атап өткен болатын. Президент олардың бастамаларына институционалдық және қаржылық қолдау көрсетілетінін мәлімдеп, Қазақстанда зерттеу жүргізуге шақырды. Бұл – ғылымның жаһандық кеңістікпен терең интеграциялануына жасалған маңызды қадам. Сыртқы істер министрлігі отандас ғалымдарды біріктіру мен Қазақстанмен байланысын нығайту бағытында тұрақты жұмыс жүргізіп келеді. Сіздердің кәсіби жетістіктеріңіз елдің халықаралық беделін арттыруға зор үлес қосып отыр, – деді Айбек Смадияров.

Сонымен қатар «Отандастар қоры» КЕАҚ президенті Данияр Қадыров қордың мақсаттары, атқарған жұмысы мен шетелдегі қазақ диаспорасымен жүйелі байланыс бағыттарын таныстырды.

– Қор 2018 жылдан бері әлемнің 30-дан астам еліндегі 200-ге жуық қазақ мәдени орталықтарымен тұрақты жұмыс жүргізіп келеді. Сол жобалардың ішінде ең маңыздыларының бірі – бесінші жыл қатарынан ұйымдастырылып келе жатқан «Жас қазақ» жазғы этно-лагері. Жыл сайын шетелден 150-ден астам жас Бурабайда демалып, қазақ тілін, тарихын, дәстүрін танып, отанымен байланысын нығайтады. Сонымен қатар шетелде табысқа жеткен отандастарымызды ел дамуына тарту мақсатында екінші жыл қатарынан тереңдетілген талдамалық зерттеу жүргізілуде, – деді ол.

Форумға шетелден 40-тан астам, Қазақстаннан 100-ге жуық ғалым мен сарапшы қатысты. Олар өз тәжірибелерін бөлісіп, ғылыми бағыттардағы жаңа идеялармен алмасып, халықаралық серіктестік мүмкіндіктерін талқылады. Германиядан келген ғалым Тұрсынжан Тоқай халықаралық ғылыми трендтер мен ғылымның стратегиялық рөлі туралы ой қозғады. Ол ғылымдағы жаһандық интеграцияның Қазақстан үшін жаңа мүмкіндіктер ашатынын атап өтті. Ал Моңғолия елінен келген Бәкей Ағыпар дәстүрлі мал шаруашылығы мен заманауи технологиялардың тиімді синтезін көтеріп, аграрлық ғылымның жаңа бағыттарын ұсынды. Өзбекстаннан форумға арнайы жеткен Сапар Байтелесов ядролық энергетика мен реакторлар физикасының Қазақстандағы даму әлеуетін саралап, осы саладағы ғылыми-техникалық мүмкіндіктерді түсіндірді. АҚШ-та қызмет ететін Алтынбек Мұрат әлемдік трендке айналған жасанды интеллекттің мүмкіндіктерін және оның ғылым мен өндірістегі рөлін ашып берді.

– Адамның жұмыссыз қалмауы үшін білім мен ғылымды дамыту аса маңызды. Жасанды интеллект барлық ғылымдармен байланысты, бірақ «адамды толығымен алмастырады» деген қауіп әзірге шындыққа жанаспайды. Дегенмен болашақта ол ықтимал. Сондықтан адам технологиядан қалыспай, әрдайым алда жүруі тиіс, – деді ол.

Форум аясында пленарлық сессиялар, ғылыми пікірталастар және «Ұлы дала» халықаралық кітап шығару байқауының тұсаукесері өтті.

Бұл – «Отандастар қоры» ұйымдастырған төртінші ірі халықаралық алаң. Бұған дейін 2019 және 2023 жылдары «Отандастар форумдары», 2024 жылы «Отандастар бизнес форумы» өткен.

The post Шетелде еңбек етіп жүрген қазақ ғалымдары Астанада бас қосты appeared first on QANDASTAR.KZ.

Қандастар қай өңірлерге қоныс аударып жатыр?

bahitzhanabzal — Thu, 20 Nov 2025 11:22:04 +0000

Қазақстанда этникалық қазақтар республиканың әртүрлі аймақтарына қоныс аударуда. Үкіметтің дерегіне сәйкес, қандастарды қоныстандыру үшін еңбек күші жетіспейтін өңірлер анықталған. Солардың қатарында: Ақмола, Абай, Атырау, Қостанай, Павлодар, Шығыс Қазақстан, Батыс Қазақстан және Солтүстік Қазақстан облыстары бар, деп жазады qandastar.kz

2025 жылға арналған қандастарды қабылдау квотасы 2 309 адам болып белгіленген. Ал биылғы 1 ақпандағы жағдай бойынша осы өңірлерге 171 қандас қоныс аударған.

Қоныстанған қандастарға арнайы субсидиялар ұсынылады. Бір мезгілде отағасына және отбасының әрбір мүшесіне 70 АЕК (шамамен 275,2 мың теңге) көлемінде қаржылай көмек беріледі. Сондай-ақ, тұрғын үйді жалға алу және коммуналдық қызметтер үшін бір жыл бойына 15-тен 30 АЕК (59–118 мың теңге) төлеуге мүмкіндік қарастырылған.

Сонымен қатар, қандастар мен азаматтарды еңбек күші жетіспейтін өңірлерге қоныс аударуға тарту мақсатында жұмыс берушілерге де қолдау көрсетіледі. Тұрғын үй сатып алу немесе салу, сондай-ақ ипотекалық несие бойынша бастапқы жарнаны жабу үшін экономикалық ұтқырлық сертификаты енгізілген. Бұл сертификат бір отбасына тұрғын үй құнының 50%-ына немесе 4,56 млн теңгеге дейін біржолғы, қайтарымсыз қаражат түрінде беріледі.

Мемлекеттік шаралар қандастардың жаңа өңірлерге бейімделуін жеңілдетіп, еңбек күшінің тапшы аймақтардағы тапшылығын азайтуға бағытталған.

The post Қандастар қай өңірлерге қоныс аударып жатыр? appeared first on QANDASTAR.KZ.

«Қазақтың үштен бірі шетте»: Ғалым көші-қон саясаты тоқырамау керегін айтты

bahitzhanabzal — Wed, 19 Nov 2025 12:47:00 +0000

Әлемнің шамамен 40 шақты елінде 6 миллионға жуық қазақ өмір сүріп жатыр. Бұл қазақ халқының үштен бірі әлі де шет мемлекеттерде тұрып жатқанын білдіреді. Белгілі ақын, танымал аудармашы, қытайтанушы-ғалым Дүкен Мәсімханұлы шетелдегі қазақтарды Отанына қайтару мүмкіндігі мен оның жолдары жөнінде өз пікірін білдірді, деп жазады qandastar.kz

Ғалымның айтуынша, шетелдегі қазақтардың басым бөлігі – Қытай, Ресей, Өзбекстан және Моңғолия аумағында тұратын ирредента, яғни тарихи атақонысында қалған қазақтар.

– Шетелдегі қандастарымыздың 90 пайызынан астамы осы төрт елде өмір сүріп отыр. Ал диаспора өкілдері – Түркия, Иран және Еуропада тұратын қазақтар. Бұрын Отанға оралуға ниеттілер негізінен ирреденталар еді, қазір де солай, – дейді ол.

Сонымен қатар ол шетелден келгісі келетіндердің әлі де көп екенін айтады.

– Ресми мәліметке қарағанда, 1,5 миллионға жуық қандас Қазақстанға көшіп келуге дайын. Бірақ біз оларды қабылдауға дайынбыз ба? Мәселе осында, – дейді Д.Мәсімханұлы.

Ғалым қандастарды Қазақстанға шақырудың бес негізгі тетігін атап өтті. Ол – құжаттандыруды жеңілдету, солтүстік өңірлерге қоныстанатын ауыл еңбеккерлеріне жерді тегін беру, зиялы қауым өкілдеріне жеңілдетілген ипотека немесе жалдамалы баспана беру, зейнет жасындағы қандастарға еңбек өтіліне сай зейнетақы тағайындау. Сондай-ақ қандас балаларға оқу жеңілдігін кеңейту, яғни квота бөлу, мектепке артық құжатсыз қабылдау.

Дүкен Мәсімханұлы бұл шаралар орындалса, қазақ көшінің қайта жанданатынына сенімді.

– Демографиялық әлеуетті көтеру – бүгінгі заман талабы. Президент Тоқаевтың «Қандастар көшін жандандыру керек» деген сөзінің астарында дәл осы мақсат жатыр, – дейді ол.

Ғалымның айтуынша, қазақ халқының біртұтас болашағы үшін сырттағы ағайынды жүйелі түрде елге тарту – стратегиялық міндет.

The post «Қазақтың үштен бірі шетте»: Ғалым көші-қон саясаты тоқырамау керегін айтты appeared first on QANDASTAR.KZ.

Жыл басынан бері қандастар қандай қолдауға ие болды?

bahitzhanabzal — Tue, 18 Nov 2025 13:21:03 +0000

2025 жылы 13 202 этникалық қазақ тарихи отанымен табысып, қандас мәртебесін алды. ҚР Еңбек және халықты әлеуметтік қорғау министрлігінің мәліметінше, 1991 жылдан бері елге жалпы 1 млн 161,2 мың этникалық қазақ қоныс аударған, деп жазады qandastar.kz

Биыл Қазақстанға келген қандастардың 45,6% – Өзбекстаннан, 42,3% – Қытайдан, 4,1% – Түрікменстаннан, 2,9% – Моңғолиядан, 2,6% – Ресейден, 2,5% – басқа елдерден келген.

2025 жылғы 1 қарашадағы жағдай бойынша қоныс аударушылардың 57,6%-ы еңбекке қабілетті жаста, 33,9%-ы – 18 жасқа дейінгі балалар, ал 8,5%-ын зейнеткерлерді құрайды. Еңбекке қабілетті қандастардың ішінде15,2%-ы – жоғары білімді, 28,2%-ы – орта кәсіби білімді, 50,5%-ы – жалпы орта білімді, 6,1%-ының білімі жоқ.

Қандастар республика бойынша әртүрлі өңірлерге қоныстандырылуда. Еңбек күші тапшы аймақтар ретінде Ақмола, Абай, Қостанай, Павлодар, Атырау, Батыс Қазақстан, Шығыс Қазақстан және Солтүстік Қазақстан облыстары анықталған.

2025 жылға арналған қандастарды қабылдау квотасы 2 309 адамды құрайды. 1 қарашадағы жағдай бойынша бұл өңірлерге 1 942 қандас көшіп келген.

Қоныстандыру аймақтарына барған этникалық қазақтар мемлекеттік қолдау шараларымен қамтылуда. Атап айтқанда көшуге – әр отбасы мүшесіне 70 АЕК (275,2 мың теңге) мөлшерінде біржолғы субсидия, тұрғын үй жалдауға және коммуналдық қызметтерге – бір жыл ішінде 15-30 АЕК (59-118 мың теңге) көлемінде төлем беріледі.

Жыл басынан бері 1010 қандасқа түрлі қолдау шаралары көрсетілді. Атап айтқанда, 313 адам тұрақты жұмысқа орналастырылды.

Солтүстік өңірлерге ерікті қоныс аударуды ынталандыру мақсатында жұмыс берушілерді қолдауға бағытталған шаралар қабылданды. Экономикалық ұтқырлық сертификаты енгізіліп, ол тұрғын үй сатып алу немесе салу, не ипотекалық қарыздың бастапқы жарнасын жабу үшін бір отбасына 4,56 млн теңгеге дейін, яғни тұрғын үй құнының 50%-ына дейін өтеусіз беріледі.

The post Жыл басынан бері қандастар қандай қолдауға ие болды? appeared first on QANDASTAR.KZ.

«Қандастарға арналған пәтерлерді жатақхана айналдырған». Әкім орынбасары заңсыз әрекеті жайлы түсініктеме берді

bahitzhanabzal — Mon, 22 Sep 2025 04:54:10 +0000

Фото: ашық дереккөз

Солтүстік Қазақстан облысында аудан әкімінің орынбасары оңтүстіктен қоныс аударушылар мен қандастарға арналған пәтерлерге бөтен адамдарды заңсыз орналастырғаны анықталды, — деп жазды qandastar.kz

Massaget.kz порталының жазуына қарағанда, Ақжар ауданы әкімінің орынбасары Оксана Киккариноваға қатысты тәртіптік іс 19 қыркүйекте әдеп кеңесінің отырысында қаралған. Прокуратура тексерісі барысында мемлекеттік тұрғын үй қорындағы пәтерлерге заңсыз қоныстану деректері әшкереленді.

«Талшық ауылындағы Заводская көшесіндегі үйде жол жұмысшылары мен мердігер компанияның инженері тұрғаны анықталды. Олар тиісті рәсімсіз, тұрғын үй комиссиясының шешімінсіз және жалдау шартынсыз орналасқан», – деді Мемлекеттік қызмет істері департаментінің басқарма бас маманы Абзал Оразамбетов.

Тексеру барысында қоныстанғандар пәтерлер уақытша жұмысшыларға берілгенін айтқан. Бір пәтерден 11 төсек орын табылған.

Қызметтік тергеу барысында аудан әкімінің орынбасары әрі тұрғын үй комиссиясының төрайымы Киккаринова бұл деректі мойындады.

«Оның айтуынша, 2024 жылғы қарашада жол жөндеу жұмыстарын жүргізіп жатқан ұйым өкілі уақытша баспана сұраған. Сол кезде ол мемлекеттік тұрғын үй қорындағы пәтерлерді ЖШС жұмысшыларына беру туралы жеке шешім қабылдаған», – деді Уразамбетов.

Әдеп кеңесінде сөйлеген Киккаринова пәтерлерді бөтендерге беруді «мәжбүрлі шара» деп түсіндірді. Себебі үйлер бос тұр, ал коммуналдық шығындарды төлеу қажет.

Оның айтуынша, ауданның коммуналдық шаруашылық бөлімінің балансында оңтүстіктен қоныс аударушыларға, қандастарға және әлеуметтік осал топтарға (жетімдер, көпбалалы отбасылар, мүгедектер) арналған 125 үй мен пәтер бар.

«Талшық ауылындағы Заводская көшесіндегі үй қоныс аударушылар мен қандастарға арналған. Үйде 13 пәтер бар, бірақ тек алтауы ғана тұрақты қоныстанған. Қалған пәтерлер бос тұр. Қыста газбен жылытуға 1,5 млн теңге қажет. Газгольдерді үш рет толтыру керек. Бұл шығынды алты пәтердің тұрғындары көтере алмайды. Сондықтан мердігер ұйым жұмысшыларын және баспанасы жоқ екі жасөспірімді қоныстандыруға шешім қабылдадым. Осылайша қысқы маусымда жылуды сақтап, шығынды бөлістік», – деді әкім орынбасары.

Ол өз әрекетінің заңсыз екенін мойындады, бірақ «басқа амал болмағанын» айтты.

Киккаринованың сөзінше, пәтерлерді апатты үйлердің тұрғындарына да ұсынған, бірақ олар сапасына байланысты бас тартқан.

Ауданда қазір әлеуметтік осал топтан 187 адам тұрғын үй кезегінде тұр. Алайда Талшықтағы бұл үй тек қоныс аударушыларға арналған, олардың ішінде кезекте тұрғандар жоқ.

Кеңес мүшелері кезектегілердің мүддесі бұзылмағанын ескеріп, әкім орынбасарына «қызметіне толық сәйкес емесі туралы ескерту» берді.

Еске салайық, бұған дейін Еңбек және халықты әлеуметтік қорғау министрлігі қандастардың Қазақстанға қоныс аударуы мен олардың қай өңірлерге қоныстандырылып жатқанын жариялаған еді.

The post «Қандастарға арналған пәтерлерді жатақхана айналдырған». Әкім орынбасары заңсыз әрекеті жайлы түсініктеме берді appeared first on QANDASTAR.KZ.