Қаланың орталық алаңына шамамен 25 мың тұрғын мен қонақ жиналып, бірнеше сағат бойы ән мен әуенге бөленді.

Тау-кен саласымен тағдыры тығыз байланысты Сәтбаев үшін бұл мереке жыл сайын асыға күтетін дәстүрлі шаралардың біріне айналған. Биыл да қала алаңында үлкен концерт ұйымдастырылып, қазақстандық өнер жұлдыздары сахнаға шықты.

Кеш барысында «МузАрт» тобы, Мирас Жүгінісов, Маржан Арапбаева, Мақпал Исабекова, Мархаба Сәби, сондай-ақ Президенттік оркестрдің солистері Еркебұлан мен Бауыржан өнер көрсетті.

«МузАрт» тобы сахнаға шыққанда көрермендердің көңіл-күйі тіпті көтеріле түсті. Музыканттар кеншілерге жылы тілегін арнап, ең алдымен қауіпсіз еңбек пен отбасы амандығын тіледі.

Одан кейін сахнаға Қайрат Нұртас шығып, көпшілікке танымал әндерін орындады. Әншіге қосылып ән айтқан көрермендер орталық алаңдағы мерекелік атмосфераны одан әрі қыздыра түсті.

Ал кештің соңғы аккорды A’Studio тобының өнерімен қойылды.

Музыканттар Сәтбаев тұрғындарын кәсіби мерекемен құттықтап, кеншілер мен байытушылардың еңбегіне құрмет білдірді.

Бірнеше сағатқа созылған концерттің соңында аспанға мерекелік отшашу атылды.

Осылайша, Сәтбаевтағы кәсіби мереке ән-жыр, көпшілік көңіл-күйі және жарқын шоуға ұласып, қала тұрғындары үшін есте қаларлық кешке айналды.

The post Қайрат Нұртас, «МузАрт», A’Studio: Сәтбаевта кеншілер күні қалай аталып өтті appeared first on QANDASTAR.KZ.