Бұл туралы Президенттің баспасөз хатшысы Айбек Смадияров мәлімдеді.

Оның айтуынша, қазақтың тазысы мен төбеті – ұлттық мәдениет пен ата-баба дәстүрінің ажырамас бөлігі.

«Құмай тазы – жеті қазынамыздың бірі, бойында адалдық, ептілік пен тектілік қасиеттері ұштасқан төл мәдениетіміздің асыл мұрасы», – деді Айбек Смадияров.

Ол тазы мен төбеттің ғасырлар бойы көшпенділер тұрмысымен бірге қалыптасып, қазақ халқын тарихи тамырымен байланыстырып келе жатқанын атап өтті.

Соңғы жылдары қазақы ит тұқымдарын сақтап, дамыту бағытында бірқатар жұмыс жүргізілген. Атап айтқанда, ұлттық ит тұқымдарын сақтау және көбейту туралы заң күшіне енді. Қазақстан Халықаралық кинология федерациясының мүшелігіне қабылданды.

Ал 2024 жылы қазақ тазысы халықаралық деңгейде алдын ала мойындалып, Қазақстан оның шыққан жері ретінде ресми бекітілді.

Қазір қазақ тазылары халықаралық көрмелерде жүлде алып жүр. Асыл тұқымды иттерді көбейту жұмысы да қарқын алып, тазы асыраушылардың қатары артып келеді. Сонымен қатар Қазақы ит тұқымдары ұлттық орталығының құрылысы аяқталуға жақын.

«Қазақ тазысы мен төбеті күнін атап өту – бірегей мұрамызды әлемге дәріптеуге септігін тигізетін маңызды қадам», – деп атап өтті Президенттің баспасөз хатшысы.

The post Қазақстанда Қазақ тазысы мен төбеті күні алғаш рет аталып өтіп жатыр appeared first on QANDASTAR.KZ.