جاڭالىقتار
تاعى قايتالاساڭ – تاماعىڭدى جىرىپ تاستايمىن: ەكىباستۇزدا ايەل بالانى قورقىتىپ, ۇرعان
فوتو: ۆيدەو سكرينشوت
30 ماۋسىم كۇنى الەۋمەتتىك جەلىلەردە ەكىباستۇز قالاسىنداعى ويىن الاڭىندا بولعان جانجالعا قاتىستى بەينەجازبا تارادى. وندا ايەل ادامنىڭ كامەلەتكە تولماعان بالاعا ايعايلاپ, بالاعات سوزدەر ايتىپ, قول جۇمساعانى كورىنىس تاپقان, دەپ حابارلايدى Qandastar.kz اقپارات پورتالى.
كادردا قورقىپ جىلاعان بالانىڭ داۋىسى انىق ەستىلەدى. ايەل تاراپىنان ەستىلگەن سوزدەر قوعامنىڭ قىزۋ تالقىسىنا ءتۇستى. اتاپ ايتقاندا, ايەل بالانى قورقىتىپ: «تاعى ءبىر رەت قايتالاساڭ – تاماعىڭدى جىرىپ تاستايمىن» دەپ ايقايلايدى.
اتالعان وقيعاعا بايلانىستى ەكىباستۇز قالاسى اكىمىنىڭ ورىنباسارى بيبىگۇل يمانعاليەۆا تۇسىنىكتەمە بەردى. ونىڭ ايتۋىنشا, 30 ماۋسىمدا بۇل دەرەك بويىنشا كۋي (قىلمىستىق قۇقىق بۇزۋشىلىقتار تۋرالى ىستەردى تىركەۋ) جۇيەسىنە ەكى ماتەريال تىركەلىپ, پروتسەسسۋالدىق شەشىم قابىلداۋ ءۇشىن ءتيىستى جۇمىستار باستالعان.
قالالىق پوليتسيا ءبولىمى تاراتقان رەسمي اقپاراتقا سايكەس, قازىرگى تاڭدا ايەل ادامنىڭ كامەلەتكە تولماعان بالاعا دەنە جاراقاتىن كەلتىرۋ دەرەگى بويىنشا تەكسەرۋ جۇرگىزىلۋدە. سوت-مەديتسينالىق ساراپتاما تاعايىندالدى. ونىڭ قورىتىندىسىنا قاراي ءىس بويىنشا پروتسەسسۋالدىق شەشىم قابىلدانادى.
