2026 жылғы 11 маусым күні таңертең Талдықорған қаласында бір жасар сәбидің биіктіктен құлауына байланысты қайғылы оқиға тіркелді. Бұл туралы Qandastar.kz сайты хабарлады.
Жергілікті журналист Сандуғаш Дүйсенованың мәліметінше, қаланың 4-шағын ауданындағы бес қабатты тұрғын үйдің маңынан шамамен бір жастағы бала табылған.
Алдын ала ақпарат бойынша, сәби тұрғын үйдің жоғарғы қабаттарының бірінен құлап кеткен. Оқиға куәгерлері дереу жедел жәрдем шақырып, бүлдіршін ауруханаға жеткізілген. Қазіргі уақытта дәрігерлер оның өмірін сақтап қалу үшін қажетті медициналық көмек көрсетіп жатыр.
Бастапқыда баланың ата-анасы мен оның қай пәтерден құлағаны белгісіз болған. Сәби медициналық мекемеге аты-жөні анықталмаған күйде түскен.
Жетісу облысы Полиция департаментінің баспасөз қызметі аталған дерек бойынша тергеу басталғанын мәлімдеді.
«Оқиғаның барлық мән-жайы анықталуда. Тергеу нәтижелері бойынша процессуалдық шешім қабылданады», – делінген ведомство хабарламасында.
Қазіргі уақытта баланың ата-анасының табылғаны немесе табылмағаны туралы ресми ақпарат жарияланған жоқ.
