Теміртауда қарияны аяусыз соққыға жыққандарға қандай шара көрілмек?

Фото:видеодан скрин

Теміртауда қарияны аяусыз соққыға жығып, оны видеоға түсірген кәмелетке толмаған балаларға қатысты мәселе Қарағанды облысы әкімдігінде қаралып, тиісті шаралар қабылданды. Бұл туралы облыс әкімі Ермағанбет Бөлекбаев өзінің әлеуметтік желіде парақшасында жазды, деп хабарлайды qandastar.kz

“Бүгін менің орынбасарым Әлібек Әлденей Қарағанды облысы бойынша кәмелетке толмағандардың істері және олардың құқықтарын қорғау жөніндегі комиссияның отырысын өткізді.

Теміртау қаласы әкімінің әлеуметтік мәселелер жөніндегі орынбасарына кәмелетке толмағандарға тиісінше бақылау жасамағаны үшін қатаң сөгіс жариялауды тапсырдым.

Сондай-ақ, жасөспірімдер оқыған білім беру мекемелері директорларының орынбасарлары тәртіптік жауапкершілікке тартылды.

Біз жасөспірімдер агрессиясына сөзсіз алаңдаймыз және болашақта осындай оқыс оқиғаларды азайту бойынша қосымша шаралар әзірлеуге кірісеміз. Барлық кінәлілер қолданыстағы заңнама шеңберінде жауапкершілікке тартылады. Бұл оқиға бойынша полиция тергеу жүргізуде.

Сондай-ақ ата-аналардан, педагогтардан балаларды тәрбиелеуге және олардың басқа адамдарға құрметпен қарауын, дұрыс құндылықтарды қалыптастыруға көбірек көңіл бөлуді сұраймын. Біз өз тарапымыздан жасөспірімдерді әлеуметтік қолдау мен алдын алу шараларын күшейту жұмыстарын жалғастырамыз”,- деп жазды өңір басшысы.

Естеріңізге сала кетейік, бұған дейін Теміртауда кәмелетке толмағандар тобы қарт ер адамның үйіне баса-көктеп кіріп, оны аяусыз соққыға жығып, болған жайтты видеоға түсіргені туралы жазған болатынбыз.