Атырауда ер адам мен массаж қызметін көрсеткен әйел арасындағы кикілжің қанды оқиғамен аяқталды. Бұл туралы qandastar.kz хабарлайды.
Әлеуметтік желілерде тараған деректерге сүйенсек, қазіргі уақытта бұл іс Атырау сотында қаралып жатыр делінген. Алайда облыстық соттың баспасөз қызметі мұндай сипаттағы іс сот өндірісінде жоқ екенін мәлімдеді.
Белгілі болғандай, күдікті — 30 жастағы әйел, ол боди-массаж саласында қызмет көрсеткен. Тергеу нұсқасына сәйкес, оқиға жаз айларында оның клиенттерін қабылдайтын пәтерде болған. Әйел мен ер адамның арасында жанжал туындап, сол сәтте күдікті қолындағы пышақпен ер адамға жарақат салған деген болжам бар.
Жараланған азамат жедел жәрдем жеткенше көз жұмған. Ал әйелдің өзі дереу полиция мен дәрігерлерге хабар берген. Кейін ол ұсталып, тергеуге алынды.
Атырау облыстық полиция департаменті оқиғаның жаз мезгілінде болғанын растады, алайда тергеу жалғасып жатқандықтан, өзге мәліметтер жария етілмеді.
