توقاەۆ كونستيتۋتسيالىق سوت توراعاسىن قابىلدادى

بۇگىنگە دەيىن زاڭدارعا وزگەرىستەر مەن تولىقتىرۋلار ەنگىزۋ ارقىلى 41 نورماتيۆتىك قاۋلى ورىندالدى. قازىر كونستيتۋتسيالىق سوتتىڭ 19 نورماتيۆتىك قاۋلىسىنداعى قۇقىقتىق ۇستانىمدارى ەسكەرىلگەن 8 زاڭ جوباسى پارلامەنت پالاتالارىندا قارالىپ جاتىر.

قاسىم-جومارت توقاەۆقا ازاماتتار ەگجەي-تەگجەيلى قۇقىقتىق كەڭەس الۋ ءۇشىن كونستيتۋتسيالىق سوت اپپاراتى جانىنداعى وتىنىشتەردى قابىلداۋ ورتالىعىنا جۇگىنە الاتىنى جونىندە باياندالدى. بۇعان دەيىن مۇنداي كونسۋلتاتسيالاردى مىڭنان استام ادام الدى. ورتالىقتاعى زاڭ كونسۋلتانتتارى مەن ادۆوكاتتار ازاماتتارعا تەگىن كەڭەس بەرەدى.

پرەزيدەنتتىڭ پىكىرىنشە, كونستيتۋتسيالىق سوت ازاماتتاردىڭ قۇقىقتارى مەن بوستاندىقتارىن قورعاۋعا كەپىل بولۋعا ءتيىس. سونىمەن قاتار سوت ورگانىنىڭ قۇقىقتىق ۇستانىمدارىن دايەكتى تۇردە ىسكە اسىرۋ ماڭىزدى.