Қасым-Жомарт Тоқаев пен Владимир Путин Мәскеуде кездесіп, екі ел арасындағы саяси және экономикалық байланыстарды талқылады. Бұл туралы Qandastar.kz сайты Stan.kz порталына сілтеп хабарлады. Кездесу барысында тараптар Жеңіс күніне қатысты пікір алмасып, Қазақстан мен Ресей ынтымақтастығының қазіргі деңгейіне тоқталды.
Қазақстан президенті Жеңіс күнінің тарихи әрі рухани маңызына назар аударып, соғыс ардагерлеріне құрмет көрсету маңызды екенін айтты. Оның сөзінше, бүгінде Қазақстанда соғыс жылдарын көзімен көрген 57 майдангер ғана қалған.
Тоқаев Ресейдің Қазақстан экономикасындағы басты серіктестердің бірі екенін атап өтті. Биыл екі мемлекет арасындағы тауар айналымы 30 миллиард доллардан асқаны айтылды. Сонымен қатар Ресейден келетін туристер саны да жоғары деңгейде сақталып отыр.
Өз кезегінде Владимир Путин Тоқаевтың Мәскеуге сапарын жоғары бағалап, бұл қадам екі ел арасындағы қарым-қатынастың нығая түскенін көрсететінін жеткізді. Кездесу соңында тараптар стратегиялық серіктестікті әрі қарай дамытуға дайын екендерін мәлімдеді.
