Президент Қасым-Жомарт Тоқаев Қазақстанның сот жүйесінде ауқымды кадрлық өзгерістер жасады, деп хабарлады qandastar.kz. Мемлекет басшысы судьяларды тағайындау және қызметтен босату туралы жаңа жарлыққа қол қойып, құжат елдің барлық өңіріне әсер етті.
Жаңартылған тізім бойынша 20-дан астам судья мен сот төрағасы қызметінен босатылып, сот жүйесіне 60-қа жуық жаңа маман келді. Кейбір судьялар зейнетке шығуына немесе өкілеттігі аяқталуына байланысты жұмыстан кетсе, енді бірқатары этика нормаларын бұзғаны және сенімнен шыққаны үшін қызметінен айырылды.
Жарлықта пара алу және алаяқтық фактілері бойынша сотталған екі судьяға қатысты нақты шешімдер бар. Оның біреуі – Ақсу аудандық сотының төрағасы Нұрлан Шәймерденов. Ол пара алғаны үшін сотталған. Айыптау үкімі күшіне енген соң қызметінен босатылды. Екіншісі – Ақтау қалалық сотының төрағасы Бауыржан Шайдуллин. Ол алаяқтық жасағаны және пара беруге итермелегені үшін кінәлі деп танылған. Бұған дейін Шайдуллинге 9 жылға бас бостандығынан айыру жазасы тағайындалғаны хабарланған.
Тағы бір судья – тәртіптік теріс қылық үшін орнынан алынды. Ғалым Қалдаров, әкімшілік істер жөніндегі мамандандырылған ауданаралық сот төрағасы. Ол қызметтік тәртіпті бұзғаны үшін жұмыстан босатылды.
Тағайындалған судьялардың ішінде әйел мамандардың үлесі көбейген. Кейбірі төменгі деңгейдегі соттардан жоғары соттарға ауысса, енді бірқатары жаңа өңірлерде жұмысын бастады.
Жаңа тағайындаулар келесі аймақтарды қамтыды: Алматы, сондай-ақ Ақмола, Ақтөбе, Атырау, Батыс Қазақстан, Қостанай, Солтүстік Қазақстан, Түркістан және Шығыс Қазақстан облыстары.