Фото: ашық дереккөз
2025 жылғы Бейбітшілік жөніндегі Нобель сыйлығы Венесуэла оппозициясының жетекшісі Мария Корина Мачадоға табысталды, деп жазды qandastar.kz
Норвегиядағы Нобель комитетінің ресми мәлімдемесінде саясаткердің бұл марапатқа лайық деп танылуының себебі — оның Венесуэла халқының демократиялық құқықтарын қорғаудағы табандылығы және елді бейбіт жолмен диктатурадан демократияға көшіру жолындағы күресі атап өтілген.
Мачадо 2024 жылғы президенттік сайлауда оппозиция атынан бірауыздан кандидат болып ұсынылған еді. Ол оппозицияның ішкі праймеризінде 90%-дан астам дауыс жинап, елдегі түрлі саяси күштерді, тіпті өзара мүдделері қабыспайтын партияларды біріктіре алған болатын.
Алайда билік оны Венесуэлаға қарсы халықаралық санкцияларды қолдады деп айыптап, оған 15 жыл мерзімге сайлауға қатысуға тыйым салған. Мачадо бұл шешімге қарсы шағым түсіргенімен, елдің Жоғарғы соты — президент Николас Мадуроның жақтастарынан құралған орган арызын кері қайтарды.
Трамптың наразылығы
АҚШ-тың бұрынғы президенті Дональд Трамп өзіне Нобель сыйлығы берілмеуіне байланысты бірнеше рет наразылығын білдірген. 2025 жылғы ақпандағы мәлімдемесінде ол:
«Олар маған ешқашан Бейбітшілік жөніндегі Нобель сыйлығын бермейді. Мен оған лайықпын, бірақ бәрібір бермейді», — деген болатын.
30 қыркүйекте америкалық әскери басшылар алдында сөйлеген сөзінде Трамп бұл тақырыпқа қайта оралып:
«Егер бұл сыйлықты басқа біреу алса, бұл біздің елімізге үлкен қорлық болады», — деп мәлімдеді.
Трамп өз әкімшілігінің бірнеше халықаралық қақтығысты тоқтатуға үлес қосқанын алға тартып, өзін бейбітшілік орнатушы ретінде бағалайды. Алайда Нобель комитеті бұл бағалаумен келіспеген сыңайлы.