Зардап шеккендер бар: Степногорда кен орны опырылды

Фото: ашық дереккөз

«Қазақалтын» ЖШС-не қарасты Бестөбе кенті филиалының екі жұмысшысы аса ауыр жарақат алған, – деп хабарлайды qandastar.kz

Белгілі болғандай, ағаш бекіткішті әзірлеу кезінде Қайрат 3 желі блогында тау жынысының бір бөлігі 700 метрден опырылып, құлаған. Салдарынан филиал жұмысшылары ауыр жарақат алған. Зардап шеккен жұмысшылар жер үстіне күндізгі 13.30 шамасында шығарылған. Жұмысшылардың біріне алғашқы медициналық көмек көрсетіліп, Степногор қалалық ауруханасына жеткізілді. 40 жастағы екінші жұмысшы ауыр жарақаттың салдарынан қаза болды. Марқұмның денесі сот-медициналық сараптамасына жеткізілген.

Қазіргі уақытта аталған қайғылы жағдайды арнайы тексеру мақсатында құрамына Мемлекеттік еңбек инспекциясы мен Өнеркәсіптік қауіпсіздік департаменттерінің өкілдері кірген комиссия құрылған. Тергеу жүргізіліп, қайғылы оқиғаның себебін арнайы құрылған комиссия анықтамақ. Оқиға бойынша өңірдің полиция қызметі де айналысып, қылмыстық іс қозғалған.

— Бестөбенің батыс кен орнында жұмысшының қаза болу фактісі бойынша байқаусызда адам өліміне әкеліп соққан еңбекті қорғау ережесінің бұзылуы бабы бойынша қылмыстық іс қозғалды, – деді Ақмола облысы Полиция департаментінің баспасөз қызметінен.