زەينەتاقى قورىنداعى قارجىنى شەشىپ الۋعا تىيىم سالىنبايدى

فوتو: اشىق دەرەككوز

قاراجاتتى ماقساتتى پايدالانۋ ءالى دە ەكى باعىتتى قامتىپ وتىر.

ول ماجىلىستەگى جيىننان كەيىن جۋرناليستەردىڭ بىرقاتار ساۋالىنا جاۋاپ بەرگەن. ۆيتسە-ءمينيستردىڭ سوزىنشە, قازاقستاندىقتارعا زەينەتاقى قورىندا جينالعان قارجىنى شەشىپ الۋعا تىيىم سالۋ جوسپارى جوق, دەپ جازادى qandastar.kz

– زەينەتاقى جيناقتارىن مەرزىمىنەن بۇرىن الۋ مەحانيزمى بىرنەشە جىل بۇرىن مەملەكەت باسشىسىنىڭ تاپسىرماسىمەن ەنگىزىلدى جانە قازىر كۇشىندە. بۇگىندە ول ەكى باعىتتى قامتيدى – تۇرعىن ءۇي جاعدايىن جاقسارتۋ جانە ەمدەلۋ ءۇشىن پايدالانۋ. زەينەتاقى جيناقتارىنىڭ نەگىزگى ماقساتى – قارتايعان شاقتا تابىستى الماستىراتىن ءتيىستى كوەففيتسيەنتپەن قامتاماسىز ەتۋ. سوندىقتان, بىرىڭعاي جيناقتاۋشى زەينەتاقى قورىنداعى (بجزق) قاراجاتتى ءتيىمدى ينۆەستيتسيالاۋ جانە ىنتىماقتى ءارى بازالىق زەينەتاقى تولەمدەرىنىڭ تيىمدىلىگىن ارتتىرۋعا باعىتتالعان پارامەترلىك وزگەرىستەر ەنگىزۋ شارالارى قابىلدانىپ جاتىر, – دەدى ول.

سونىمەن قاتار, اقمادي سارباسوۆ بۇعان دەيىن تۋىنداعان قاراجاتتى ماقساتتى پايدالانۋ, ەمدەۋگە جۇمسالاتىن شىعىندار ماسەلەسىمەن دەنساۋلىق ساقتاۋ مينيسترلىگى اينالىسىپ جاتقانىن جەتكىزدى.

– بۇل باعىتتاعى جۇمىس جالعاسۋدا, الايدا بەلگىلەنگەن پارامەترلەر اياسىندا ەشقانداي شەكتەۋلەر ەنگىزۋ جوسپاردا جوق, – دەپ ناقتىلادى ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى.