Жалған жүктілік туралы анықтаманы пайдалану арқылы мас күйінде жол апатына себеп болған әйел әкімшілік қамаудан құтылған. Алайда кейін прокурорлар құжаттың жалған екенін анықтап, заң бұзушылықтың бетін ашты. Бұл туралы Qandastar.kz хабарлады.
Ақсу ауданаралық соты әкімшілік іс бойынша бұрынғы полиция қызметкерін пара алу және дәлелдемелерді қолдан бұрмалау бойынша кінәлі деп таныды.
Прокуратура мәліметінше, жүргізуші куәлігі жоқ әйел мас күйінде көлік жүргізіп, жол-көлік оқиғасын жасаған. Сот барысында оның жүкті екені туралы медициналық анықтама ұсынылып, осыған байланысты әкімшілік қамау жазасы айыппұлмен ауыстырылған.
Алайда кейін тексеру кезінде ұсынылған медициналық құжаттың жалған екені анықталған. Тергеу барысында сыбайлас жемқорлық фактісі тіркеліп, полиция қызметкерінің дәлелдемелерді бұрмалауға қатысы бары дәлелденген.
Сот бұрынғы полиция қызметкеріне 6,6 миллион теңге көлемінде айыппұл салды. Сонымен қатар оған өмір бойы мемлекеттік қызмет атқаруға тыйым салынып, арнайы атағынан айырылды. Пара ретінде алынған қаражат тәркіленіп, мемлекет кірісіне өткізілді.
Прокуратура бақылаушы орган қызметкерлерінің бұл істі анықтаудағы жұмысын атап өтіп, олардың кәсіби әрекеттеріне оң баға берді.
Сот үкімі әзірге заңды күшіне енген жоқ.
