«Japon kelin»: Qazaqstandyq otbasy japonııalyq qyzǵa syrǵa saldy

Foto: vıdeodan alyndy

Japonııada syrǵa salǵan qazaq otbasy jelide qyzý talqyǵa tústi, dep habarlaıdy Qandastar.kz. 

Áleýmettik jelilerde Japonııada ótken syrǵa salý rásiminiń vıdeosy qyzý talqylanýda. Vıdeoda qazaq otbasy japon qyzynyń úıine baryp, ulttyq dástúr boıynsha quda túsip, qulaǵyna altyn syrǵa taqty. Bul rásim qazaq halqynda qyz ben jigittiń resmı túrde sóz baılasqanyn bildiredi.

Dıas esimdi jigittiń anasy bul – otbasy úshin mańyzdy qadam bolǵanyn aıtyp, dál osy dástúrdi saqtaý úshin arnaıy Japonııaǵa barǵandaryn jetkizgen.

Jeli qoldanýshylarynyń basym bóligi qýanyshtaryn bildirip, túrli pikir jazǵan. Ásirese er adamdar ázil-shyny aralas jazbalar qaldyrǵan:

«Endi Toyota bizdiki», «Kelin ádemi eken», «Jastarǵa baqyt tileımiz!»

Degenmen, pikirlerdiń bári birdeı jyly qabyldanbady. Keıbir qazaqstandyq áıelder bul jaǵdaıǵa tańdanyspen qarap:

«Nege qazaq qyzdary sheteldikke turmysqa shyqqanda osylaı qýanbaısyzdar?», «Qazaqtyń qyzdary basqa ultqa tıse, bári synap, ursyp shyǵady. Er bala úılense +1 kelin bola ma?», – dep, qoǵamda aralas nekelerge qatysty qosarlanǵan standart baryn ashyq jazdy.

Bul oqıǵa tek dástúrdiń shetelde jalǵasýy ǵana emes, sonymen birge qoǵamdaǵy kózqarastar men pikir qaıshylyǵyn da kórsetti.