Jas jubaılar Qytaıdan Astanaǵa atpen kele jatyr

Qytaı Halyq Respýblıkasynyń Tarbaǵataı aımaǵynan jolǵa shyǵyp, Qazaqstannyń elordasy – Astanaǵa deıin atpen jetýdi maqsat etken Qýatbek Túsiphanuly men Jaına Erkinqyzy uzaq saparyn jalǵastyrýda, dep habarlaıdy Qandastar.kz Kazinform-ǵa silteme jasap.

Tarbaǵataı aımaǵyna qarasty Saýan aýdanynan 8 tamyz kúni jolǵa shyqqan jas jubaılar bir aıǵa jýyq ýaqytta myń shaqyrymnan astam joldy artqa tastady.

Qos saıahatshy ulttyq kıimderin kıip, tarıhı kósh joldaryn qaıta jańǵyrtyp, babalardyń at ústindegi ómir saltyn búgingi kúnmen sabaqtastyrýdy murat etken. Olardyń aıtýynsha, bul joba – tek sporttyq nemese mádenı sapar ǵana emes, eki el arasyndaǵy dostyq baılanystardy nyǵaıtýǵa baǵyttalǵan sımvoldyq shara.

– Bizdiń basty maqsatymyz – el kórip, jer kórip, saıahattaý arqyly ulttyq mádenıetimizdi, salt-dástúrimizdi násıhattaý, at jalynda ósken qazaqtyń myqtylyǵyn, kóshpendilerdiń sán-saltanatyn tanystyrý. Ulan baıtaq dalany at tuıaǵymen dúbirletken batyr babalarymyzdyń rýhyn sezinip, búgingi jastarǵa, tózimdilik pen erliktiń úlgisin kórsetkimiz keledi. Sonymen birge Qazaqstan men Qytaı arasyndaǵy mádenı baılanystardy nyǵaıtýǵa az da bolsa úlesimizdi qosýdy maqsat tuttyq, — deıdi Qýatbek Túsiphanuly.

Attylar Qorǵas shekarasy arqyly ótip, Jarkent qalasyn basyp, Almatyny betke alyp keledi. Ázirge Almatyǵa 100 shaqyrymdaı jol bar. Saıahatshylar odan ári Saryarqanyń saıyn dalasyn basyp ótip, Astanaǵa jetýdi josparlap otyr. Sapardyń jalpy aralyǵy 2 500 shaqyrymynan asady.

– Shekara talaptaryna saı, Qorǵasqa deıin minip kelgen attarymyzdy sol jerge qaldyryp, bergi betten eki at satyp aldyq. Jol boıy turǵyndar erekshe yqylaspen qarsy alyp, as-sýlaryn berip, kómek qolyn sozyp jatyr. «Jol azabyn júrgen biler» demekshi alys joldy atpen júrý ońaı emes, Dese de kezdesken adamdardyń jáne áleýmettik jelidegi jurttyń qoldaýy bárin umyttyryp jiberedi. Joldaǵy ásem tabıǵatty, kórikti jerlerdi, kórgen-bilgenimizdi túsirip, áleýmettik jelige jarııalap kelemiz. Qazir kúnine 50 shaqyrymǵa jýyq joldy artqa tastaımyz. Osy eseppen Astanaǵa jetý úshin áli 1 aı at ústinde bolamyz, — deıdi saıahatshylar.