Ресейлік тележүргізуші Руслан Осташко өзінің Telegram-арнасында Қазақстан Мәжілісінің депутаты Бақытжан Базарбектің ойын-сауық нарығында енгізілгелі жатқан Біртұтас есеп жүйесіне (БЕЖ) қатысты сыни пікірлеріне қатысты ой бөлісті, деп жазады qandastar.kz
Осташко бұл жүйені Ресей тарапынан қарастырылған инфрақұрылымдық жоба ретінде бағалауға болатынын айтты.
Базарбек Мәжілістегі заңнама комитетінің отырысында БЕЖ-ге қарсы шығып, оның ресейлік NomaPay компаниясымен байланысына назар аударған. Оның дерегінше, букмекерлік нарықтың жылдық 3,9 трлн теңге айналымының шамамен 80%-ы Ресейдегі операторға кетіп, Қазақстанда тек комиссиялық табыс ғана қалуы мүмкін.
Депутат сонымен қатар БЕЖ-ге қатысты түзетулердің «Әкімшілік құқықбұзушылық туралы» заң жобасына кең талқылаусыз енгізілгенін сынға алды. Ол ұсыныстарда БЕЖ комиссиясын Бәсекелестікті қорғау және дамыту агенттігімен келісу талабы алынып тасталып, операторға Ұлттық банктің бақылауынсыз бірқатар банктік операцияларды орындау құқығы берілетінін атап өтті.
Базарбек өз уәждерін Facebook желісінде жариялаған еді, алайда жазба келесі күні өшіріліп кетті. Депутат бұл пост ұзақ тұрмауы мүмкін екенін алдын ала ескерткен.
Осташко кейіннен депутатты «жеке мүддені көздеп отыр» деп айыптады.
Бұған дейін Қазақстанның Қаржылық технологиялар және инновациялар қауымдастығы БЕЖ жүйесін ілгерілету кезінде жалған ақпарат берді деп Мәдениет және ақпарат министрлігіне қарсы сотқа жүгінген. Сарапшылар жүйенің санкциядағы ВТБ банкімен байланысы болуы мүмкін екенін және бұл елдің қаржы жүйесіне тәуекел төндіретінін айтқан.
Базарбектің мәлімдемесінен кейін БЕЖ төңірегіндегі пікірталас күшейе түсті. Қоғамдық талқылаудың өзегі — ойын бизнесіндегі қаржы ағындарын кім бақылауы қажет және жаңа есеп жүйесі қалай реттелуі тиіс деген сұрақтар.
