Жетісу облысында мұз үстіндегі құтқару жұмыстары қайғылы жағдаймен аяқталды. Қызметтік міндетін атқару кезінде төтенше жағдайлар қызметкері ерлікпен қаза тапты, деп хабарлайды qandastar.kz порталы.
Алтынкөлдегі құтқару операциясы қайғылы аяқталды
7 наурыз күні Жетісу облысы Панфилов ауданына қарасты Атамекен ауылдық округіндегі Алтынкөл көлінде балық аулап жүрген азаматтардың бірі мұз жарылып, көлдің ортасына қарай ағып кеткен. Оқиға туралы хабар түскеннен кейін дереу құтқару қызметтері жұмылдырылды.
Оқиға орнына Жетісу облыстық төтенше жағдайлар департаментінің күштері, Жаркент қаласындағы №11 өрт сөндіру бөлімінің қызметкерлері, Талдықорғандағы жедел-құтқару жасағы, сондай-ақ ТЖМ-нің «Барыс» республикалық құтқару қызметі мен Алматы облысының құтқарушылары жетті.
Құтқару операциясы барысында мұз қайта жарылып, күтпеген жағдай орын алды. Сол сәтте Панфилов ауданындағы №11 өрт сөндіру бөлімінің қарауыл бастығы, азаматтық қорғау майоры Дамир Таранов қызметтік міндетін орындау кезінде қаза тапты.
Антына адал болған офицер
Дамир Таиржанович Таранов 1994 жылы 28 маусымда дүниеге келген. Ол азаматтық қорғау саласындағы жолын 2012 жылы Көкшетау техникалық институтына оқуға түсу арқылы бастаған.
2016 жылдан бастап өртке қарсы қызметте еңбек етіп, Панфилов ауданы мен Қапшағай қаласындағы өрт сөндіру бөлімдерінде түрлі жауапты қызметтер атқарды. Соңғы жылдары Панфилов ауданындағы №11 өрт сөндіру бөлімінде қарауыл бастығы болып жұмыс істеп, кәсіби шеберлігімен және батылдығымен әріптестері арасында үлкен құрметке ие болды.
Құтқарушы соңғы сәтіне дейін антына адал болып, адамдардың өмірін қорғау жолында қызметтік борышын орындады.
Марқұмның артында жұбайы мен екі баласы қалды.
Төтенше жағдайлар қызметінің әріптестері мен қоғам марқұмның отбасы мен жақындарына қайғырып көңіл айтты.
