Қазақстандықтар 2026 жылдың сәуір айынан бастап жүргізуші куәлігін оның жарамдылық мерзімі өтіп кеткеннен кейін де онлайн түрде ауыстыра алады. Аталған ақпаратты qandastar.kz сайты Zakon.kz порталына сілтеме жасап жариялады.
Жағымды жаңалықпен 25 ақпанда
ҚР Жасанды интеллект және цифрлық даму министрлігінің баспасөз қызметі бөлісті. Жаңашылдық жүргізуші куәлігінің барлық санаттарына қатысты. Егер құжаттың мерзімі өтіп кетсе, оны ауыстыру үшін міндетті түрде медициналық тексеруден өту қажет. Медициналық қорытынды туралы мәліметтер өтінім беру кезінде мемлекеттік ақпараттық жүйелерден автоматты түрде жүктеледі. Ал куәлікті мерзімі аяқталмай тұрып ауыстырған жағдайда медициналық тексеру талап етілмейді. Қызмет көрсету уақыты – 60 минут.
Қызметті eGov.kz порталы немесе eGov Mobile мобильді қосымшасы арқылы алуға болады. Пайдаланушы тиісті бөлімге кіріп, қызметті таңдап, фотосурет пен қолтаңба үлгісін жүктейді, ХҚКО-ны көрсетеді және 1,25 АЕК көлеміндегі мемлекеттік баж салығын төлейді. Қайта өтінім берген кезде «Бұрын төленген» функциясын қолдануға мүмкіндік бар.
Өтінім нәтижесі eGov.kz порталындағы Жеке кабинетте және eGov Mobile қосымшасындағы хабарламалар бөлімінде көрсетіледі. Дайын құжатты өтінім беру кезінде таңдалған ХҚКО-дан жеке куәлікті ұсыну арқылы алуға болады.
Сондай-ақ жүйе жүргізушінің айыппұлдарын автоматты түрде тексереді. Егер 30 күннен асқан төленбеген айыппұл болса, ол толық өтелгенге дейін куәлікті ауыстыру мүмкін емес.
