«1 ملرد تەڭگە ۇرلانعان»: قما بولات ماجاعۇلوۆتىڭ قاماۋعا الىنعانىن راستادى

فوتو: اشىق دەرەككوز

اcتانا قالاسى مادەنيەت باسقارماسىنىڭ بۇرىنعى باسشىسىن سۋبۇرقاقتى سالۋ كەزىندە اقشا جىمقىرعانى ءۇشىن قاماۋعا الدى, دەپ حابارلايدى  qandastar.kz Skifnews.kz اقپارات پورتالىنا سىلتەمە جاساپ.

استانا قالاسىنىڭ «مادەنيەت باسقارماسى» مم-ءنىڭ بۇرىنعى باسشىسى مەن مەردىگەر ۇيىم وكىلدەرىنە قاتىستى اسا ءىرى كولەمدە بيۋدجەت قاراجاتىن جىمقىرۋ فاكتىسى بويىنشا قارجىلىق مونيتورينگ اگەنتتىگى سوتقا دەيىنگى تەرگەۋ امالدارىن جۇرگىزۋدە.

2016 جىلى استانا كۇنى مەرەكەسىنە وراي سالىنعان «كۇن» («ەسىل وزەنىندەگى جارىق-يلليۋميناتسيالىق جانە وت شوۋى») سۋبۇرقاعىنىڭ قۇرىلىسى كەزىندە مەملەكەتتىك ساتىپ الۋ راسىمدەرى جۇرگىزىلمەي, تىكەلەي كەلىسىمشارتتار جاسالعان.

سۋبۇرقاق جوبالىق قۇجاتتاماسىز جانە مەملەكەتتىك ساراپتامادان وتپەي سالىنعان.

قۇرىلىس بارىسىندا تەحنيكالىق سيپاتتامالارعا سايكەس كەلمەيتىن ساپاسىز ماتەريالدار قولدانىلعان.

ناتيجەسىندە اتالعان نىسان 2017 جىلدان باستاپ جۇمىس ىستەمەي, قازىرگى تاڭدا اپاتتى جاعدايدا تۇر.

ۇرلانعان قاراجاتتىڭ كولەمى 1 ملرد تەڭگەدەن اسىپ وتىر.

كۇدىكتى, استانا قالاسىنىڭ «مادەنيەت باسقارماسى» مم-ءنىڭ بۇرىنعى باسشىسى ۇستالىپ, ۋاقىتشا ۇستاۋ يزولياتورىنا قامالدى. تەرگەۋ اياسىندا ونىڭ مۇلكىنە تىيىم سالىندى. ونىڭ ىشىندە 3 كوممەرتسيالىق نىسان, 2 اۆتوتۇراق ورنى جانە استانا قالاسىنداعى پرەميۋم ساناتتاعى پاتەر.

اتالعان ءىس بويىنشا كۇدىكتىلەردىڭ مۇلكىنە جالپى سوماسى 572 ميلليون تەڭگەدەن استام سوماعا شەكتەۋ قويىلدى.

قر قپك 201-بابىنا سايكەس, سوتقا دەيىنگى تەرگەپ-تەكسەرۋ دەرەكتەرى جاريا ەتۋگە جاتپايدى.

قر كونستيتۋتسياسىنىڭ 77-بابىنىڭ 3-تارماعىنىڭ 1-تارماقشاسىنا جانە قر قىلمىستىق-پروتسەستىك كودەكسىنىڭ 19-بابىنىڭ 1-بولىگىنە سايكەس, قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن اركىم كىناسىز دەپ ەسەپتەلەدى.

ەگەر ءسىز وكىلەتتىكتەردى تەرىس پايدالانۋ, قاراجاتتى جىمقىرۋ نەمەسە باسقا دا ەكونوميكالىق قۇقىق بۇزۋشىلىقتار فاكتىلەرى جايلى بىلسەڭىز, «افم Insider» تەلەگرام بوتىنا حابارلاۋىڭىزدى سۇرايمىز.

انونيمدىلىككە كەپىلدىك بەرىلەدى.