جاڭالىقتار
1 شىلدەدەن باستاپ 3 300 قازاقستاندىقتىڭ جالاقىسى 100% ءوستى
فوتو: اشىق دەرەككوز
بۇگىننەن باستاپ ەلىمىزدىڭ ورمان جانە تابيعات قورعاۋ مەكەمەلەرىنىڭ قىزمەتكەرلەرى لاۋازىمدىق جالاقىلارىنا ەكى ەسە ۇستەماقى الادى. ءتيىستى قاۋلىعا پرەمەر-ءمينيسترى ولجاس بەكتەنوۆ قول قويدى. بۇل تۋرالى Stan.kz اقپارات اگەنتتىگى حابارلايدى.
ورمان جانە تابيعات قورعاۋ ۇيىمدارىنىڭ قىزمەتكەرلەرىنە ەڭبەكاقى تولەۋ جۇيەسىن, شارتتارى مەن مولشەرىن جاقسارتۋ ءۇشىن «ازاماتتىق قىزمەتشىلەرگە, مەملەكەتتىك بيۋدجەت قاراجاتى ەسەبىنەن ۇستالاتىن ۇيىمداردىڭ قىزمەتكەرلەرىنە, قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» ۇكىمەت قاۋلىسىنا وزگەرىستەر ەنگىزىلدى.
“قۇجاتقا سايكەس ورمان ءورتىن ءسوندىرۋ ستانتسيالارىنىڭ, ورمان مەكەمەلەرىنىڭ, تابيعات قورعاۋ جانە ورمان ورنالاستىرۋ ۇيىمدارىنىڭ قىزمەتكەرلەرى لاۋازىمدىق جالاقىلارىنا 100%-عا دەيىن ۇستەمەاقى الادى. ولاردىڭ ىشىندە ورمان ءورتىن سوندىرۋشىلەر, ءورت ءسوندىرۋ ماشينالارىنىڭ جۇرگىزۋشىلەرى, تراكتورشى-ماشينيستەر, راديووپەراتورلار, ءورت ءسوندىرۋ ماشينالارىن, جابدىقتارى مەن اپپاراتۋرالارىن جوندەيتىن سلەسارلار, ءورت-باقىلاۋ مۇناراسىنىڭ باقىلاۋشىلارى بار”, – دەلىنگەن حابارلامادا.
سونداي-اق 113 اۆياتسيالىق كۇزەت ءورت ءسوندىرۋشى-دەسانتشىنىڭ جالاقىسى كوتەرىلەدى. ول ءۇشىن 2024-2027 جىلدارعا ارنالعان رەسپۋبليكالىق بيۋدجەتتەن 8 480,1 ميلليون تەڭگە كولەمىندە قارجى ءبولىندى. بارلىعى 3 300-گە جۋىق قىزمەتكەر قوسىمشا ۇستەماقى الاتىن بولدى.
