1 تامىزدان باستاپ قازاقستاندا نە وزگەرەدى: باستى جاڭالىقتار مەن ماڭىزدى رەفورمالار

2025 جىلدىڭ 1 تامىزىنان باستاپ ەلدە بىرقاتار ماڭىزدى وزگەرىستەر كۇشىنە ەنەدى, دەپ جازدى Qandastar.kz. تاريفتەر كوتەرىلەدى, زاڭنامالار جاڭارىپ, الەۋمەتتىك جانە ەكونوميكالىق باستامالار جۇزەگە اسادى. سونىمەن قاتار مادەني ءىس-شارالار مەن حالىقارالىق بايلانىستار دا نازاردان تىس قالمايدى. نازارلارىڭىزعا ەڭ وزەكتى وزگەرىستەردى ۇسىنامىز.

ەلەكتر ەنەرگياسى مەن اۆتوگاز باعاسى وسەدى

شىمكەنت پەن تۇركىستان وبلىستارىندا ەلەكتر جارىعى ءۇشىن جاڭا تاريفتەر ەنگىزىلەدى:

– حالىق ءۇشىن – 26,64 ₸/كۆت·ساع

– كوممەرتسيالىق تۇتىنۋشىلار – 44,75 ₸

– بيۋدجەتتىك ۇيىمدار – 74,08 ₸

– ارنايى ايماقتار ءۇشىن – 38,42 ₸

سونىمەن قاتار سۇيىتىلعان گازدىڭ شەكتى باعاسى كوتەرىلدى:

– كوتەرمە باعا: 59 722 ₸/توننا

–  بولشەك باعا: 7–10 ₸/ليتر (وڭىرگە قاراي)

اقش قازاقستان ەكسپورتىنا 25% باج سالىعىن ەنگىزەدى

1 تامىزدان باستاپ اقش تاراپىنان بىرقاتار قازاقستاندىق ونىمدەرگە 25% مولشەرىندە كەدەندىك سالىق سالىنباق. مۇناي, ۋران جانە مەتالدار بۇل تىزىمگە كىرمەيدى. الايدا فوسفور, بيداي كلەيكوۆيناسى مەن وپتيكالىق لينزالار سىندى ونىمدەرگە اسەر ەتۋى مۇمكىن. جاڭا ۇيلەرگە قولما-قول تولەۋگە تىيىم سالىنادى ەندى قۇرىلىس كەزەڭىندەگى پاتەرلەرگە تولەم تەك بانك ارقىلى جۇزەگە اسادى. ماقسات – ۇلەسكەرلەردىڭ قۇقىقتارىن قورعاۋ جانە قارجىلىق اشىقتىقتى قامتاماسىز ەتۋ.

ChatGPT Plus جازىلىمى قىمباتتايدى

OpenAI قازاقستانداعى قولدانۋشىلار ءۇشىن ندس ەنگىزىپ, جازىلىم باعاسىن $22.40-قا كوتەرەدى. بيزنەس سۋبەكتىلەرى بسن ەنگىزۋ ارقىلى سالىقتان بوساتىلۋى مۇمكىن.

ۇلتتىق اۋىلشارۋاشىلىق ساناعى باستالدى

1–31 تامىز ارالىعىندا sanaq.gov.kz سايتىندا ونلاين رەجيمدە اۋىلشارۋاشىلىق ساناعى وتەدى. ساۋالناما فەرمەرلەر مەن اۋىل تۇرعىندارىن قامتيدى. بارلىق مالىمەتتەر قۇپيا ساقتالادى.

«قازاحتەلەكوم» ارحيۆتىك تاريفتەردى جاڭارتادى

«پراكتيچنىي», «بازوۆىي» جانە «كەرەمەت 2» تاريفتەرى وزگەرتىلىپ, ينتەرنەت پەن مينۋتتار كولەمى ارتتى. باعاسى 2 098 ₸ مەن 2 600 ₸ ارالىعىندا.

قوسىمشا ۇبت وتكىزىلەدى

10–20 تامىز ارالىعىندا تالاپكەرلەر قوسىمشا ۇبت تاپسىرا الادى. پاندەر كومبيناتسياسىن وزگەرتۋگە مۇمكىندىك بار.

SCAT الماتى – مينسك رەيسىن ىسكە قوسادى

10 تامىزدان باستاپ SCAT اۋە كومپانياسى جاڭا حالىقارالىق باعىتتى اشادى. ۇشۋلار اپتاسىنا ەكى رەت ورىندالادى.

دجەننيفەر لوپەس قازاقستاندا كونتسەرت وتكىزەدى

1 تامىز – استانادا, 10 تامىز – الماتىدا الەمدىك دەڭگەيدەگى كونتسەرتتەر وتەدى. بيلەت باعاسى – 40 000–180 000 ₸. بيۋدجەتكە سالىق ءتۇسىمى – 400 ملن ₸ دەيىن.

Beeline اۋدارىمدارىنا كوميسسيا ەنگىزەدى

Beeline قوسىمشاسى ارقىلى باسقا وپەراتورلارعا اقشا اۋدارعاندا 0,5% كوميسسيا ۇستالادى.

سپورتقا قاتىساتىن بالالارعا جاس شەكتەۋى ەنگىزىلەدى

146 سپورت ءتۇرى بويىنشا قاتىسۋدىڭ ەڭ تومەنگى جاسى بەكىتىلدى.

مىسالى:

• باتۋت, گيمناستيكا – 5 جاستان
• بادمينتون – 6 جاستان
• ۆەلوسپورت – 13 جاستان.

ابايدىڭ 180 جىلدىعى اتاپ وتىلەدى

سەمەي مەن اباي وبلىسىندا 1–10 تامىز ارالىعىندا 100-دەن استام ءىس-شارا ۇيىمداستىرىلادى. Abay Academy پلاتفورماسى ىسكە قوسىلىپ, كونتسەرتتەر, ايتىس, مارافوندار وتەدى. جۇلدە رەتىندە – 9 كولىك پەن 90 جىلقى قاراستىرىلعان.

كونستيتۋتسيا كۇنىنە بايلانىستى ۇزارتىلعان دەمالىس

30 تامىز سەنبىگە تۇسكەندىكتەن, دەمالىس كۇنى 1 قىركۇيەككە (دۇيسەنبى) اۋىستىرىلادى. وسىلايشا 5 كۇندىك جۇمىس كەستەسىمەن جۇرگەندەر ءۇشىن ءۇش كۇن قاتارىنان دەمالىس بولادى: 30, 31 تامىز جانە 1 قىركۇيەك.

تامىز ايىنداعى اۋا رايى

اي باسىندا نايزاعاي مەن جاۋىن-شاشىن كۇتىلەدى. 2 تامىزدان باستاپ اۋا تەمپەراتۋراسى تومەندەيدى. جامبىل, تۇركىستان, الماتى, اباي, قاراعاندى جانە قىزىلوردا وبلىستارىندا قۇرعاقشىلىق قاۋپى ساقتالادى.