جاڭالىقتار
10 ملن تەڭگە: پەريزات قايرات ىسىندە گەننادي گولوۆكيننىڭ اتى اتالدى
استاناداعى قىلمىستىق ىستەر جونىندەگى اۋدانارالىق سوتتا پەريزات قايراتقا قاتىستى الاياقتىق جانە اقشانى جىلىستاتۋ ءىسى بويىنشا سوت پروتسەسى جالعاسۋدا. كەزەكتى وتىرىستا باستى كۋاگەرلەردىڭ ءبىرى – MMG Development كومپانياسىنىڭ باسشىسى, كاسىپكەر ءمولدىر ءسۇيىنشالى سوتتا كۋالىك بەردى. ول تانىمال بوكسشى گەننادي گولوۆكيننىڭ قولعابىن قايىرىمدىلىق اۋكتسيونىندا 10 ميلليون تەڭگەگە ساتىپ العانىن, بىراق قاراجاتتىڭ ناقتى قالاي جۇمسالعانىنا كۇمانى بار ەكەنىن ايتتى, دەپ حابارلايدى Qandastar.kz سايتى Skifnews.kz اقپارات پورتالى.
كۋاگەردىڭ ايتۋىنشا, 2021 جىلى پەريزات قايرات ونى Instagram جەلىسى ارقىلى بايلانىسقا شاقىرىپ, «Sheraton» قوناقۇيىندە وتەتىن قايىرىمدىلىق كەشىنە قاتىسۋعا ۇسىنىس جاساعان. كەشكە بيزنەس جانە ساياسات وكىلدەرى قاتىسقان. رەسمي تۇردە بۇل ءىس-شارا ەرەكشە قاجەتتىلىگى بار بالالارعا ارنالعان وڭالتۋ ورتالىعىن سالۋ ماقساتىندا ۇيىمداستىرىلعانى ايتىلعان.
«مەنى كاسىپكەر رەتىندە شاقىردى. پەريزاتپەن جازىسقان حاتىمىزدا جينالعان قارجى بالالار ورتالىعىن سالۋعا جۇمسالاتىنى كورسەتىلگەن», – دەدى ءمولدىر ءسۇيىنشالى سوتتا.
ول كەش بارىسىندا ۇيىمداستىرىلعان اۋكتسيوندا گەننادي گولوۆكيننىڭ بوكس قولعابىن 10 ميلليون تەڭگەگە ساتىپ العانىن جانە بۇل قاراجاتتى ءوز كومپانياسى اتىنان رەسمي تۇردە «BizBirgemiz Kazakhstan» قوعامدىق قورىنا اۋدارعانىن ايتتى.
كاسىپكەر العاشقىدا بۇل جوبانى يگى ءارى مەملەكەتتىك دەڭگەيدەگى باستاما رەتىندە قابىلداعانىن ايتتى. الايدا ءبىراز ۋاقىت وتكەن سوڭ ورتالىقتىڭ قۇرىلماعانىن بىلگەن.
«باستاپقىدا سەنىم بولدى. بىراق كەيىن جوبانىڭ تاعدىرىنا قاتىستى ناقتى اقپارات الا المادىم. قاراجات دىتتەگەن ماقساتىنا جەتكەنىنە كۇمان تۋدى. سوندىقتان 10 ميلليون تەڭگەنى قايتارۋ تۋرالى ازاماتتىق تالاپ ارىز بەردىم», – دەدى ول.
ەگەر قاراجات ورتالىق قۇرىلىسىنا جۇمسالسا, كاسىپكەر شاعىمى بولمايتىنىن, الايدا قارجى باسقا ماقساتتارعا جۇمسالسا, قايتارىلۋى ادىلەتتى ەكەنىن ايتتى.
سوتتا ءمولدىر ءسۇيىنشالى سونىمەن قاتار پەريزات قايراتقا جەكە قاجەتتىلىگى ءۇشىن 14 ميلليون تەڭگە قارىز بەرگەنىن دە جاريا ەتتى. بۇل قاراجات ءبىر جىل ىشىندە قايتارىلماعان, كەيىن جەكە تالاپ ارىز ارقىلى سوت شەشىمىمەن ءوندىرىپ الىنعان.
