10 mln teńge: Perızat Qaırat isinde Gennadıı Golovkınniń aty ataldy

Astanadaǵy Qylmystyq ister jónindegi aýdanaralyq sotta Perızat Qaıratqa qatysty alaıaqtyq jáne aqshany jylystatý isi boıynsha sot proesi jalǵasýda. Kezekti otyrysta basty kýágerlerdiń biri – MMG Development kompanııasynyń basshysy, kásipker Móldir Súıinsháli sotta kýálik berdi. Ol tanymal boksshy Gennadıı Golovkınniń qolǵabyn qaıyrymdylyq aýkıonynda 10 mıllıon teńgege satyp alǵanyn, biraq qarajattyń naqty qalaı jumsalǵanyna kúmáni bar ekenin aıtty, dep habarlaıdy Qandastar.kz saıty Skifnews.kz aqparat portaly.

Kýágerdiń aıtýynsha, 2021 jyly Perızat Qaırat ony Instagram jelisi arqyly baılanysqa shaqyryp, «Sheraton» qonaqúıinde ótetin qaıyrymdylyq keshine qatysýǵa usynys jasaǵan. Keshke bıznes jáne saıasat ókilderi qatysqan. Resmı túrde bul is-shara erekshe qajettiligi bar balalarǵa arnalǵan ońaltý ortalyǵyn salý maqsatynda uıymdastyrylǵany aıtylǵan.

«Meni kásipker retinde shaqyrdy. Perızatpen jazysqan hatymyzda jınalǵan qarjy balalar ortalyǵyn salýǵa jumsalatyny kórsetilgen», – dedi Móldir Súıinsháli sotta.

Ol kesh barysynda uıymdastyrylǵan aýkıonda Gennadıı Golovkınniń boks qolǵabyn 10 mıllıon teńgege satyp alǵanyn jáne bul qarajatty óz kompanııasy atynan resmı túrde «BizBirgemiz Kazakhstan» qoǵamdyq qoryna aýdarǵanyn aıtty.

Kásipker alǵashqyda bul jobany ıgi ári memlekettik deńgeıdegi bastama retinde qabyldaǵanyn aıtty. Alaıda biraz ýaqyt ótken soń ortalyqtyń qurylmaǵanyn bilgen.

«Bastapqyda senim boldy. Biraq keıin jobanyń taǵdyryna qatysty naqty aqparat ala almadym. Qarajat dittegen maqsatyna jetkenine kúmán týdy. Sondyqtan 10 mıllıon teńgeni qaıtarý týraly azamattyq talap aryz berdim», – dedi ol.

Eger qarajat ortalyq qurylysyna jumsalsa, kásipker shaǵymy bolmaıtynyn, alaıda qarjy basqa maqsattarǵa jumsalsa, qaıtarylýy ádiletti ekenin aıtty.

Sotta Móldir Súıinsháli sonymen qatar Perızat Qaıratqa jeke qajettiligi úshin 14 mıllıon teńge qaryz bergenin de jarııa etti. Bul qarajat bir jyl ishinde qaıtarylmaǵan, keıin jeke talap aryz arqyly sot sheshimimen óndirip alynǵan.