جاڭالىقتار
10 مىڭ ۆولتتىق توققا تۇسكەن قازاقستاندىق امان قالدى
فوتو: الماتى دسب
ناۋقاس ءوز قاتەلىگىنەن جاراقات العان.
دارىگەرلەر 27 جاستاعى ەر ادامدى امان الىپ قالۋ ءۇشىن 2 اي كۇرەستى. ۇزاق ۋاقىتقا سوزىلعان ەم مەن 5 پلاستيكالىق وتانىڭ ارقاسىندا ەر ادام اياققا تۇردى, دەپ حابارلادى turkystan.kz پورتالى Stan.kz اقپارات اگەنتتىگىنە سىلتەمە جاساپ.
10 مىڭ ۆولتتىق توققا تۇسكەن ايان جەتىسۋ وبلىسى الاكول اۋدانىندا ەلەكتر مونتاجداۋشى بولىپ جۇمىس ىستەيدى. ول كوكتەمدە جۇمىستا ءجۇرىپ توققا تۇسكەن. العاشقى 10 كۇن جانساقتاۋ بولىمىندە جاتسا, جاعدايى تۇراقتالعان سوڭ الماتىداعى №4 قالالىق كلينيكالىق اۋرۋحاناعا اۋىستىرىلدى.
كومبۋستيولوگ ماماندار ناۋقاسقا ەكىنشى دارەجەلى ەلەكتر جاراقاتى, بىلەك, قول, ءىش, تاباننىڭ IV دارەجەلى كۇيىك دياگنوزىن قويدى. دارىگەر-كومبۋستيولوگ ەلدوس المەنوۆتىڭ ايتۋىنشا, ەر ادام اۋرۋحاناعا اۋىر جاعدايدا جەتكىزىلگەن.
“53 كۇن ەمدەلىپ, 5 رەت پلاستيكالىق وتا جاسالدى. وڭ مەن سول قولىنىڭ سۇق ساۋساعى جانسىزدانىپ قالدى. دەسە دە حيرۋرگتار قولداعى ينفەكتسيانىڭ تارالۋى مەن اياعىن كەسىپ تاستاۋدىڭ الدىن الىپ, قالعان ساۋساقتارىن امان الىپ قالدى. ايان اۋرۋحانادان ۇيىنە جىبەرىلدى”, – دەيدى ول.
ناۋقاس ءوز قاتەلىگىنەن جاراقات العانىن ايتادى. ول ءوزىن اياققا تۇرعىزعان دارىگەرلەرگە العىسىن ءبىلدىردى.
“قالالىق اۋرۋحانانىڭ دارىگەرلەرى مەن قىزمەتكەرلەرىنىڭ ماعان جاساعان جاقسىلىقتارى ۇشىن العىس ايتامىن. 53 كۇن بويى مەنىڭ ءومىرىم ءۇشىن كۇرەستى, مەدبيكەلەر قارادى, دارىگەرلەر ەمدەدى. دارىگەرلەرگە العىسىم شەكسىز”, – دەيدى ايان.
