10 جاسار قىزىن زورلاعان وگەي اكە تەرگەۋدەن سوڭ بوساپ شىقتى

فوتو: اشىق دەرەككوز

الماتى وبلىسىنىڭ اقشي اۋىلىندا 10 جاسار قىزىنا ەكى جىل بويى زورلىق كورسەتتى دەپ ايىپتالعان وگەي اكەسى 12 ايدان كەيىن تەرگەۋ يزولياتورىنان شىقتى, دەپ جازادى qandastar.kz

Orda.kz رەداكتسياسىنا قىزدىڭ اناسى (ەسىمدەرى وزگەرتىلدى – رەد.) ءىستىڭ سوتقا جەتپەگەنىن جانە تەرگەۋدىڭ ءادىل وتپەگەنىن ايتىپ, جان ايقايىن جەتكىزدى.

اناسى مەن اجەسى ادىلدىك ىزدەپ بارلىق جەرگە جۇگىنگەن, بارماعان جەرى قالماعان. قىزدىڭ تۋىستارىمەن بىرگە قورعاۋشىسى ءراتجان بەرسىنباەۆ پەن پسيحولوگ مارجان جومارتقىزى وقيعانىڭ ءمان-جايىمەن ءبولىستى.

وقيعا 2023 جىلى بولعان. اناسى قىزىنىڭ وگەي اكەسىنەن كورگەن قورلىعىن ناعاشى اجەسىنەن بىلگەن.

«بۇل — قىزىمنىڭ ەكىنشى نەكەسى, بۇل ەركەكتەن ەكى بالاسى بار. بىرگە تۇرعاندارىنا 5 جىل بولعان, تۇڭعىش قىز العاشقى نەكەدەن تۋعان. نەمەرەم دەمالىستا ۇيگە كەلگەندە: «اجە, ماعان پاپا تيىسەدى, اياق-قولدارىمدى, دەنەمدى سيپايدى», — دەپ ايتتى. تيىسە مە دەپ سۇراپ ەدىم, ءتيىستى دەدى. مەن بىردەن اناسىنا حابارلاما جازدىم. ول سەنبەي, مۇمكىن ەمەس دەدى. ەرتەسىنە جەكەمەنشىك گينەكولوگقا اپاردىم, ول جەردە وزگەرىس بار دەپ ايتتى. قىز قالاي بولعانىن تولىق ايتىپ بەردى. ونى جۇمىسقا الداپ اپارعان, ماشينادا جانە ۇيدە دە قورلىق كورسەتكەن», — دەيدى اجەسى.

اناسىنىڭ ايتۋىنشا, وگەي اكەسى قىزعا ماسساج جاساتاتىن بولعان.

«ءبىز 2017 جىلى الەۋمەتتىك جەلى ارقىلى تانىسىپ, ۇيلەندىك. قىزىمدى ەشقاشان ۇناتپايتىن, ۇنەمى ۇرىسىپ, تيىسە بەرەتىن. مال باقتىرىپ, قورا تازالاتىپ قوياتىن. اراشا تۇسسەم, «قىزىڭا ءوز قىزىمداي قاراعانىمدى قالاساڭ, ارالاسپا», — دەيتىن. تالاي تاياق جەدىم. قىزىم كەيدە تومەنگى جاعى قىشىپ, اشيتىنىن ايتاتىن, بىراق مەن ءمان بەرمەي, «دارەت ال» دەپ قويا سالاتىنمىن. ءتىپتى ارت جاعىمنان ءبىر سۇيىقتىق اعىپ جاتىر دەگەندە, مەن جاي عانا ءىشى وتكەن ەكەن دەپ ءمان بەرمەدىم. ءبىر كۇنى بولمەگە كىرسەم, قىزىمدى كورپەمەن جاۋىپ, ۇستىنە جاتقىزىپ الىپتى. «نە ىستەپ جاتسىڭ?» دەپ سۇراسام, «بۇگىن قىزىم 5 الىپ كەلىپتى, ەركەلەتىپ جاتىرمىن» دەپ قويا سالدى», — دەدى اناسى.

قىزدىڭ اناسى كۇيەۋىنىڭ تەلەفونىنان جاسوسپىرىمدەرگە قاتىستى جازبانى بايقاپ قالعانىن ايتادى.

«مەن ول بىرەۋمەن سويلەسەتىن شىعار دەپ ويلايتىنمىن, سەبەبى ۇنەمى «تەلەفونىما تيىسپە» دەپ ايتاتىن. بىراق ءبىر كۇنى تەلەفوندى قۋاتتاۋعا قويعاندا, كوزىم ءتۇسىپ قالدى. سوندا ونىڭ پورنو-سايتتان «س دوچكوي» دەگەن مازمۇندى قاراعانىن كورىپ, شوشىپ كەتتىم. بىراق قىزىم ەمەس شىعار, جاي عانا كورگەن شىعار دەپ ءوزىمدى جۇباتتىم», — دەيدى اناسى.

اناسىنىڭ ايتۋىنشا, جازعى دەمالىستا قىزدى ناعاشى اجەسىنىڭ ۇيىنە ارەڭ جىبەرگەن. بىراق جىبەرەر الدىندا وگەي اكەسى قىزىنا ۇيدەگى جاعدايدى ەشكىمگە ايتپا دەپ قايتا-قايتا ەسكەرتىپ وتىرعان.

«قىزىما ناعاشىلارى كەلە جاتقاندىقتان, ادەمى كويلەگىن كيگىزىپ قويعانمىن. سول ۋاقىتتا وگەي اكەسى قورا تازالايمىز دەپ الىپ كەتتى. مەن كويلەگى تازا, تيىسپەشى دەسەم دە, قويماي الىپ كەتتى. قىزىم ءبىراز ۋاقىتتان سوڭ كويلەگىن اۋىستىرىپ كەلدى, مەن تاعى دا ءمان بەرمەدىم», — دەدى اناسى.

قىزدىڭ اناسى سۇحبات بەرۋ بارىسىندا قاتتى سەنگەن ادامى وسىلاي ىستەگەنىنە ءوزىن كىنالاپ,  كوز جاسىن تيا المادى.

«جازعى دەمالىس بىتۋگە از قالعان كەزدە قىزىما تەلەفون شالىپ, 2 كۇننەن كەيىن الىپ كەتەمىز دەپ ەدىم, قايتقىسى كەلمەيتىنىن ايتتى. كەشكە انام حابارلاما جازىپ جىبەرىپتى: «قىزىڭا قارامايسىڭ با, كۇيەۋىڭ تيىسەدى ەكەن عوي», — دەپ. مەن دەرەۋ قوڭىراۋ شالىپ, گينەكولوگقا اپارۋىن ءوتىندىم. كەلەسى كۇنى انام قىزىمدى اپارىپتى. گينەكولوگ راستادى, بىراق قاعاز جازىپ بەرۋدەن باس تارتىپ, بۇل ءۇشىن ەكسپەرتتەر قاعاز بەرەدى دەپ قايتاردى», — دەدى.

اناسىنىڭ ايتۋىنشا, گينەكولوگ زورلىق بەلگىلەرىن كورە تۇرا, پوليتسياعا حابار بەرۋدەن دە, قاعاز بەتىنە ءمان-جايدى جازۋدان دا باس تارتقان.

«بۇل وقيعا 2023 جىلدىڭ تامىز ايىندا بولدى. ەكى كۇننەن سوڭ قىزىما بارىپ, بولعان وقيعا تۋرالى سۇرادىم, ول بارلىعىن راستادى. انامنىڭ ۇيىندە كۇيەۋىمە «وسىلاي جاساپسىڭ عوي» دەپ ايتقاندا, ول ءوز كىناسىن مويىنداماي, سول جەردەن قاشىپ كەتتى. ءبىز پوليتسياعا شاعىم ءتۇسىرىپ, قىركۇيەك ايىندا «كورەمىز» باعدارلاماسىنا ادىلدىك ىزدەپ باردىق.
باعدارلاما بىزگە ادۆوكات رەتىندە عابيت ومىربەك مىرزانى ۇسىندى. مەن عابيت مىرزاعا سەنىمحات جازىپ بەردىم. WhatsApp جەلىسىندە توپ اشىپ, بارلىق مالىمەتتى جىبەرىپ وتىردىق. مەن جىبەرگەن مالىمەتتەردى عابيت ەكىنشى تاراپقا بەرىپ وتىردى. 12 ايدان كەيىن عابيت كۇدىكتىنىڭ «جالا جابىلدى» دەگەن سەبەپپەن تەرگەۋ يزولياتورىنان شىققانىن حابارلاپ, پوست جاريالادى. مەنىڭ قىزىمنىڭ قۇقىعىن قورعايمىن دەپ, كۇدىكتىنى بوستاندىققا شىعارىپ جىبەردى», — دەدى اناسى.

بۇل ىسكە قاتىستى 3 ساراپتاما جۇرگىزىلگەن. ەڭ ءبىرىنشى ەكسپەرتيزا وڭ ناتيجە كورسەتكەنىمەن, تەرگەۋشىلەر ۋاقىت وتە 2 جانە 3-ساراپتامالار جۇرگىزگەن. ەكىنشى ەكسپەرتيزا تەرىس ناتيجە كورسەتكەندىكتەن, قىزدىڭ ءىش كيىمى دالەل بولسا دا, ءىستى 12 ايدان كەيىن جاۋىپ تاستادى.

پسيحولوگ كۇدىكتى زورلىق-زومبىلىقتى جوسپارلى تۇردە جاساعانىن ايتادى.

«ۇزاق ۋاقىت قىزدى بەيىمدەپ, دايىنداپ الىپ زورلاعان. بويىن ۇيرەتىپ العاننان كەيىن عانا كىرىسكەن. قورقىتۋ, ۇرۋ ارقىلى قىزدىڭ ءوزىن كىنالى سەزىنۋىن پايدالانعان. قاساقانا, جوسپارلى تۇردە جاسالعان زورلىق-زومبىلىق. مەديتسينا تىلىمەن انىق-قانىعىن ايتپاي-اق قويايىن. قىزعا زورلىق-زومبىلىقتىڭ بارلىق ءتۇرىن جاساعان», — دەيدى مارجان جومارتقىزى.

ءىس سوتقا جەتپەي جابىلعاندىقتان, اناسى ادۆوكات ءراتجان بەرسىنباەۆتان وسى ءىستى قولعا الۋىن وتىنگەن. Orda.kz ءتىلشىسى وسى وقيعادان كەيىن ادۆوكات بەرسىنباەۆ, قىزدىڭ اناسى جانە پسيحولوگ مارجان حانىممەن بىرگە ىلە اۋداندىق پروكۋراتۋراسىنا باردى. پروكۋراتۋرا بولىمشەسىندە ءتىلشىمىزدىڭ قۇرالدارىن كىرەبەرىستە الىپ قالدى. ءىستى قايتا اشۋ ماقساتىندا پروكۋراتۋراعا جۇگىنگەن.

«ساراپشىلاردىڭ قورىتىندىسى بويىنشا ءىستى جاپتىق. قۇجاتتاردى قوناەۆ قالاسىنان الا الاسىزدار. پەدوفيلدى بوستاندىققا شىعارا سالاتىن ءبىز اقىماق ەمەسپىز عوي. ونىڭ كىنالى ەكەنى دالەلدەنگەن جوق», — دەدى ىلە اۋدانى باس پروكۋرورىنىڭ ورىنباسارى.

بىزگە قۇجاتتار قوناەۆ قالاسىندا دەپ, سول جاققا باعىتتادى. ەرتەسىنە ءبىز قوناەۆ قالاسىنداعى الماتى وبلىستىق پروكۋراتۋراسىنا جول تارتتىق.

Orda.kz رەداكتسياسى عابيت ومىربەككە حابارلاسىپ, ءىستىڭ ءمان-جايىن انىقتادى.

عابيت ومىربەكتىڭ ايتۋىنشا, ول «كورەمىز» باعدارلاماسىنا ىڭكاردىڭ (ەسىمى وزگەرتىلدى – رەد.) ءىسى بويىنشا مامان-سپيكەر رەتىندە قاتىسقان, بىراق قىزدىڭ قۇقىعىن قورعاۋ تۋرالى ناقتى ۋادە بەرمەگەن. باعدارلامادا ايتىلعان دەرەكتەر كۇمان تۋدىرىپ, ول وسى ماسەلە بويىنشا تۋىستارىنان قوسىمشا اقپارات العان. تۋىستارى كۇدىكتىنىڭ كىناسىز ەكەنىن دالەلدەيتىن قۇجاتتارىن كورسەتىپ, كومەك سۇراعاننان كەيىن عانا ول تەرگەۋدىڭ ونىنشى ايىندا ىسكە قوسىلعان.

«ول كەزدە مەن ىڭكاردىڭ قۇقىعىن قورعاۋ تۋرالى ۋادە بەرگەن جوقپىن. ءتىپتى باعدارلامادان كەيىن قۇرىلعان چاتتان دا ۋاقىت وتە شىعىپ كەتتىم. سەبەبى باعدارلاما كەزىندە, ءدال سول مەزەتتە-اق, سوت-مەديتسينالىق ساراپتاماسىنىڭ قورىتىندىسى, اناسىنىڭ جاۋابى جانە تالقىلانعان باسقا دا دەرەكتەر كۇمان تۋدىرعانىن ايتقانمىن.باعدارلاما ەفيرگە شىققاننان كەيىن كۇدىكتىنىڭ تۋىستارى حابارلاسىپ, مەن ايتقان كۇدىكتەردىڭ نەگىزسىز ەمەس ەكەنىن راستايتىن قۇجاتتارىن كورسەتتى. ولار كۇدىكتىنىڭ كىناسىزدىگىن دالەلدەپ, كومەك سۇرادى. وسىدان كەيىن تەرگەۋدىڭ ونىنشى ايىندا ىسكە ارالاسىپ, Instagram پاراقشامدا ءىستىڭ ءمان-جايىن جاريالاپ وتىردىم», — دەيدى عابيت ومىربەك.

عابيت ومىربەك Instagram پاراقشاسىندا ءىستىڭ ەگجەي-تەگجەيىن ءبولىسىپ, قۇقىق قورعاۋ ورگاندارىنا تەرگەۋگە ەرەكشە نازار اۋدارۋدى سۇراعان. 12 ايلىق تەرگەۋ ناتيجەسىندە كۇدىكتى كىناسىز دەپ تانىلىپ, بوستاندىققا شىعارىلعان.

قازىرگى تاڭدا ءىستى قايتا اشۋعا ءوتىنىش قارالىپ جاتىر. Orda.kz رەداكتسياسى ءىستى باقىلاۋدا ۇستاپ, جاڭالىقتارمەن حاباردار ەتىپ وتىرادى.