“10 جىل وقىپ, 112 مىڭ تەڭگە الامىن”: قازاقستاندىق جاس دارىگەر ايلىعىنا كوڭىلى تولمايتىنىن جەتكىزدى

فوتو: جەكە قورىنان

ۇلمەكەن جاندۋلاەۆا – رەزيدەنت-نەۆرولوگ, رەزيدەنتۋرادا 2-كۋرس وقيدى. بيىل مەديتسينا سالاسىندا ءبىلىم الىپ جاتقانىنا 11 جىل بولادى. ول TikTok-تاعى پاراقشاسىنا 11-جىل ءبىلىم الىپ ءجۇرىپ جۇمىس ىستەگەنىنە 112 000 تەڭگە ايلىق الاتىنىن جازدى. Stan.kz اقپارات اگەنتتىگى ۇلمەكەنگە حابارلاسىپ, ءمان-جايدى سۇرادى. مەديتسينا ساراپشىسىنان دا دارىگەرلەردىڭ جالاقىسى ماسەلەسىن دە ءبىلدى, دەپ جازدى qandastar.kz

“112 000 تەڭگە جالاقىم تۇسكەندە نە سەزىنەرىمدى بىلمەي قالدىم”

«جالاقىم تۇسكەندە قانداي رەاكتسيا تانىتاتىنىمدى بىلمەي قالدىم. جىلايىن با, كۇلەيىن بە? قازىر 11-جىل وقىپ جاتىرمىن. جالپى تاجىريبە دارىگەرى بولىپ تا جۇمىس ىستەدىم», – دەپ جازدى ول.

ۇلمەكەن جاندۋلاەۆا 2014 جىلدان بەرى مەديتسينا سالاسىندا ءبىلىپ الىپ كەلەدى. ماماندىق تاڭداعاندا دارىگەرلەردىڭ جالاقىسى از بولاتىنىن ەسكەرمەپپىن دەيدى ول.

«ەرەسەكتەر جانە بالالار نەۆرولوگياسى, رەزيدەنتۋرا, 2-كۋرس ستۋدەنتىمىن. دارىگەر بولۋدى بالا كەزىمنەن ارماندادىم. انام دا مەديتسينا سالاسىنىڭ قىزمەتكەرى بولدى. بۇرىن وقۋعا تۇسپەي تۇرعاندا دارىگەرلەردىڭ ايلىعى تۋرالى بىلمەدىم. بۇل جاعىن ەسكەرمەپپىن. بۇرىن 5 جىل جالپى مەديتسينا, 2 جىل ينتەرناتۋرا ءپروفيلدى ماماندىق وقۋ تۋرالى كەلىسىمشارت بار ەدى. الايدى 2019 جىلى بۇيرىق وزگەرىپ, بارلىعىمىز جالپى تاجىريبە دارىگەرى ماماندىعىنا تۇستىك. قالاساق تا, قالاماساق تا وسىلاي بولدى. قازىرگى ايلىعىم 112 000 تەڭگە, ال رەزيدەنتۋرانى وقىپ بىتىرگەندەر 224 000 تەڭگە جالاقى الادى. 112 000 تەڭگە – 0,5 كولەم ءۇشىن تولەنەتىن سوما. مەن رەزيدەنت-نەۆرولوگ بولعاندىقتان, تەك 0,5 كولەمدە جۇمىس ىستەي الامىن. وقۋىمدى بىتىرگەن سوڭ عانا 1 كولەمدە جۇمىس ىستەيمىن. 0,5 كولەمدە جۇمىس – 4 ساعات», – دەيدى ول.

استانا تۇرعىنى وسى 4 ساعاتتا 11-15 پاتسيەنت, ال ءبىر ايدا 220 پاتسيەنتتەن كوپ قارايتىنىن ايتتى.

ء“بىر كۇندە 11-15 پاتسيەنت قارايمىن. ءبىر ايدا 220 پاتسيەنت نەمەسە ودان دا كوپ بولادى. ءار پاتسيەنتكە 15 مينۋت بەرىلگەن. باسىندا قينالاتىنمىن, قازىر ۇيرەندىم. ەگەر جاعدايى اۋىر پاتسيەنتتەر بولسا, قابىلداۋدان سوڭ قارايمىن نەمەسە ءسال ۇزاق ۋاقىت بولەمىن. ستيپەنديا (نەگىزى رەزيدەنتۋرا شاكىرتاقىسى 120 000 تەڭگە) المايمىن, اقىلى بولىمدە وقيمىن (جىلىنا 1 800 000 تەڭگە) ارينە, الاتىن ايلىعىما كوڭىلىم تولمايدى. الايدا بارلىق جەردە جاس مامانعا وسىلاي تولەيدى. ايلىق از ەكەنىن, كوڭىلىم تولمايتىنىن, جەتپەيتىنىن ەشكىمگە ايتقان ەمەسپىن. ارامىزدا وقۋدى تاستاعاندار از بولمادى. اركىم ءار ۋاقىتتا كەتتى. بىرەۋ 1-كۋرcتا كەتسە, ەكىنشىلەرى 7 جىل وقۋدى ءبىتىرىپ بارىپ مەديتسينادان باس بۇرعان. مەن ءۇشىن دۇرىس, تۇراقتى ءبىلىم الۋ ماڭىزدى بولدى. ايلىق از ەكەنىن ءوزىم جالپى تاجىريبە دارىگەرى بولعاندا ءبىلدىم», – دەيدى ول.

ال استانادا جۇمىس ىستەيتىن جالپى پراكتيكا دارىگەرلەرى 250 000 تەڭگە جالاقى الادى. بىراق ولارعا جان باسىنا شاققانداعى ستاندارتتىڭ ىنتالاندىرۋشى كومپونەنتى, سارالانعان ەڭبەكاقى جۇيەسى, پسيحو-ەموتسيالىق جۇكتەمە ءۇشىن تولەم قوسىلادى. سوندا شامامەن 300-دەن جوعارى جالاقى شىعادى. جۇمىس تاجىريبەسى, كۆاليفيكاتسياسى بولسا, جالاقىسىنا قوسىلا بەرەدى.

“قازاقستاندا دارىگەرلەردىڭ جالاقىسى باسەكەگە ساي ەمەس”

بۇل ماسەلە تۋرالى دەنساۋلىق ساقتاۋ سالاسى بويىنشا ساراپشى, الماتى ءماسليحاتىنىڭ دەپۋتاتى اكىم تۇرسۇننىڭ پىكىرىن بىلدىك. ونىڭ سوزىنشە, قازاقستاندا دارىگەرلەردىڭ جالاقىسىن كوتەرۋ شارالارى قاراستىرىلعان, دەگەنمەن جالاقى كولەمى باسەكەگە قابىلەتتى ەمەس.

«دارىگەرلەردىڭ جالاقىسىن كوتەرۋ شارالارى قاراستىرىلعان. جەكە الساق, مىسالى, اۋىلعا بارىپ جۇمىس ىستەپ جاتقان دارىگەرلەرگە جەرگىلىكتى اتقارۋشى ورگانداردان بەرىلۋى كەرەك. بىراق ونىڭ كوپ بولىگى جاسالىپ جاتقان جوق. ال جالپى مينيسترلىكتىڭ بۇيرىعى بويىنشا, ناقتى بەكىتىلگەن تياناقتالعان ەڭبەكاقى بەرىلەدى. سول ازاماتتاردىڭ جالاقىسىن مينيسترلىك پەن ورگاننىڭ بۇيرىعىمەن ۇيىمنىڭ قورىنداعى سومانىڭ جەتۋىنە قاراي, جىل باسىندا ءار مەكەمە باسشىسى كوتەرۋىنە بولادى. تياناقتالعان ەڭبەكاقى تەحنيكالىق قىزمەتكەرلەردە بولادى. ال نەگىزگى ماماندار مەن جالپى دارىگەرلەر جۇمىس تاجىريبەسى مەن كاتەگورياسىنا قاراي ارنايى كولەمدەگى جالاقىنى الادى. ءدال قازىر وسى قىزمەتكەرلەردىڭ جالاقىسىن كوتەرۋ بويىنشا ەشقانداي بۇيرىق شىققان جوق. ەلىمىزدە دارىگەرلەردىڭ جالاقىسى باسەكەگە قابىلەتتى دەپ ايتا المايمىز», – دەدى ول.

ساراپشىنىڭ سوزىنشە, اسىرەسە مەملەكەتتىك مەكەمەلەردە جۇمىس ىستەيتىن دارىگەرلەردىڭ جالاقىسى از, ال جەكە مەكەمەلەر مەن ەمحانالاردا جالاقى جوعارى. سوندىقتان مەديتسينا ماماندارى جەكەمەنشىك مەكەمەگە اۋىسۋعا ءماجبۇر.

«كوپ دارىگەر مەملەكەتتىك مەكەمەدە جۇمىس ىستەپ, ابدەن تاجىريبە جيناعان سوڭ جەكەمەنشىك مەكەمەگە كەتىپ قالۋعا تىرىسادى. وسىلايشا مانسابىن جاقسى جالاقىمەن جالعاستىراتىندار بار. 224 000 تەڭگە ايلىق وتە از. سوندىقتان دارىگەرلەردىڭ جالاقىسىن قايتا قاتاستىرۋ كەرەك دەگەن ۇسىنىس بار. ارينە, از جالاقى جۇمىس ساپاسىنا اسەر ەتەدى. مەملەكەتتىك مەكەمەدە تاجىريبە جيناعان دارىگەر جەكە ەمحانالارعا كەتۋگە ءماجبۇر بولادى. بۇل جەردە ءبىز ولاردى ۇستاپ قالا المايمىز. ويتكەنى ول مەملەكەت بولگەن گرانت ەسەبىنەن وقىپ, ونى 3 جىل ەڭبەكپەن وتەپ قويعان», – دەپ تۇيىندەدى اكىم ءتۇرسۇن.

قازىر دارىگەرلەردىڭ جالاقىسى قانشا?

ەسكە سالا كەتەيىك, قازاقستاندا دارىگەرلەردىڭ ايلىق تابىسى قانشا ەكەنىن مينيسترلىكتەن انىقتاپ, جازعان ەدىك.

2024 جىلدىڭ ءۇشىنشى توقسانى بويىنشا جالاقى مولشەرى مىناداي (بىر ستاۆكا):

• ساناتى جوق, جۇمىس ءوتىلى 1 جىلعا دەيىنگى اۋىل دارىگەرىنىڭ جالاقىسى – 306,8 مىڭ تەڭگە بولسا, قالادا دارىگەرلەر 384,4 مىڭ تەڭگە ايلىق الادى.

2023 جىلى ەڭبەك تاجىريبەسى 1 جىلعا دەيىنگى, ەشقانداي ساناتقا جاتپايتىن دارىگەرلەردىڭ جالاقىسى شامامەن 306,8 مىڭ تەڭگە بولدى.

• بيىل 1-ساناتتى, 13-16 جىل جۇمىس ءوتىلى بار ورتا بۋىندى مەديتسينا قىزمەتكەرلەرىنىڭ ايلىعى 222,5 مىڭ تەڭگە بولىپ بەلگىلەندى. بۇل سانات بويىنشا اۋىلدا جۇمىس ىستەيتىن ورتا بۋىندى مەديتسينا قىزمەتكەرلەرى 245,9 مىڭ تەڭگە, ال قالادا 199,2 مىڭ تەڭگە جالاقى الادى.
• ال 1-ساناتتى, 13-16 جىل جۇمىس ءوتىلى بار دارىگەردىڭ جالاقىسى – 401,5 مىڭ تەڭگە. بۇل ساناتتاعى دارىگەرلەر اۋىلدا 445,5 مىڭ تەڭگە جالاقى السا, قالالىق دارىگەرلەرگە 357,5 مىڭ تەڭگە ايلىق بەلگىلەنگەن.

ايتا كەتەيىك, بىلتىر 13–16 جىل ەڭبەك ءوتىلى (1 ستاۆكا) بار ءبىرىنشى ساناتتى جالپى تاجىريبە دارىگەرىنىڭ جالاقىسى شامامەن 384 مىڭ تەڭگە ەدى.

• ال 1-ساناتتى, ەڭبەك ءوتىلى 20 جىلدان جوعارى اۋىلدا تۇراتىن جالپى تاجىريبە دارىگەرلەرى 400,7 مىڭ تەڭگە, قالالىقتار 501,7 مىڭ تەڭگە جالاقى الادى. ال بىلتىر ەڭبەك ءوتىلى 25 جىلدان جوعارى (1 ستاۆكا) ساناتتى جالپى تاجىريبە دارىگەرىنىڭ جالاقىسى شامامەن 430,6 مىڭ تەڭگە ەدى.

سونىمەن قاتار جەرگىلىكتى اتقارۋشى ورگانداردىڭ اقپاراتىنا سايكەس, 2024 جىلى قوسىمشا تولەمدەردى, اقىلى قىزمەتتەردى, كەشەندى جان باسىنا شاققانداعى ءنورماتيۆتىڭ ىنتالاندىرۋشى كومپونەنتى بويىنشا تولەمدەردى, سارالانعان تولەمدەردى ەسكەرە وتىرىپ, ورتاشا جالاقى (ەل بويىنشا):

• دارىگەر – 597 مىڭ تەڭگە;
• ورتا مەديتسينا قىزمەتكەرى – 307 مىڭ تەڭگە بولدى.

دەنساۋلىق ساقتاۋ مينيسترلىگىنىڭ مالىمەتىنشە, 2020 جىلدان باستاپ 2023 جىلعا دەيىن, ياعني 4 جىل ارالىعىندا مەديتسينا قىزمەتكەرلەرىنىڭ جالاقىسىن جىل سايىن ارتتىرۋ جوسپارلاندى. اتاپ ايتقاندا, دارىگەردىڭ ايلىعى 30%, ورتا مەديتسينا قىزمەتكەرىنىڭ (فەلشەر, اكۋشەر, مەيىرگەر, سانيتارلىق فەلدشەر) جالاقىسى 20% كوبەيدى.