«100 myń aılyq alamyn»: Shymkenttiń eks-ákiminiń aǵasy Marat Áıtenov balalaryna 50 myń teńge alıment tóleıdi

Foto: ashyq derekkóz

Otbasyn kúshtep úıden qýyp shyqqan Marat Áıtenov burynǵy jubaıy Dana Áteshovanyń kóp sózin jalǵan dep, múlik úshin janjaldaspaıtynyn jáne onymen talasqa túspegenin málimdedi. Bul týraly Stan.kz aqparat agenttigi Barys Media Youtube-arnasyna silteme jasap habarlaıdy.

Áıtenovtyń sózinshe, bala-shaǵasyn shyǵaryp jibergen úıdi 2017 jyly ákesi satyp alǵan. Onda qaryndasy men ákesi 1 jyl turǵan eken. 2018 jyldyń shildesinen keıin Marat Áıtenov otbasymen birge ákesimen birge turýǵa kelisedi. Biraq 1 jyldan soń ákesi bólek ketse kerek.

Sózinshe, ákesi bul úıdi keıin oǵan syı retinde tabystap, atyna aýdaryp bergen. Mundaı úıler bóliske salynbaıdy deıdi ol.

“Pandemııa kezinde Dana ekeýmizdiń aramyzda janjal kóbeıip, ajyrasý týraly usynys aıttym. Ol qazannyń 16-y ajyrasý týraly ótinish berdi de, jeltoqsanda tolyq ekige kettik. Múlik, bala, t.b. boıynsha shaǵymy joq ekenin aıtty”, – dedi Áıtenov.

Aıtýynsha, keıin úıdi de, páterdi de talap etip, balalardyń atyna jazýdy suraǵan.

“Biz bul úıde turýǵa 1 jyl ýaqyt berdik, keıin ony bosatý kerek edi. Ornyna páter berdik. “250 kvadrattyq úıdi qaraı almaısyń, odan da páterde tur” dedim. Sebebi ondaı úlken úıge kútim kerek, al ol eńbekke asa mashyqtanbaǵan”, – dedi ol.

Sózinshe, ol ajyrasqan soń Dana Áteshovaǵa Land Cruiser kóligin jáne Astanadaǵy 4 bólmeli páterdi bergen. Biraq ol azdyq etti dep otyr.

“Men oǵan alǵashynda “ortaq páterimizdi sataıyq ta, aqshany bólip alaıyq dep edim, kelispedi, tolyq páterdi ber dedi. Dananyń kúıeýge shyqqanǵa deıin 2012 jyly alǵan óz páteri bar. Ony 2022 jyly satty. Men bergen kólikti 23 mıllıon teńgege satty. Endi úlken úıdi de alǵysy keldi. Men múlik úshin talaspaımyn, ol mańyzdy emes. Sol 4 bólmeli páterge ornalassyn”, – dedi Áıtenov.

Sondaı-aq áıeli menshikti bosatý sheshimin oryndamaǵanyn jáne balalardy jazǵy demalys ýaqytynda 1 aı onymen turýǵa bermegenin atap ótti.

Aıtýynsha, osyndaı Áteshovanyń málimdemelerinen keıin ol jumysynan shyǵyp qalǵan jáne kóp mekemeler onymen jumys istegisi kelmeıdi.

“Shý basylsyn dep oqýǵa kettim. Qaıtyp kelgenimde, ol menen úlken soma talap etip, “áıtpese Internette shý shyǵaramyn” dedi”, – deıdi ol.

Osyǵan deıin alımentsiz-aq bala-shaǵasynyń barlyq shyǵynyn jaýyp júrgenin aıtady. Biraq keıin burynǵy áıeli odan alıment talap etipti.

“3 bala úshin jalaqynyń 50%-y beriledi. Men oǵan balalardyń shyǵyny odan da kóp ekenin eskerttim. “Tańda: eger alıment tólesem, tek osy 50%-dy tóleımin, al bylaı alımentsiz barlyq shyǵynyn tóleımin” dep aıttym. Qazir 100 myńnyń 50 myńy Dana Áteshovaǵa ketip jatyr”, – dedi Áıtenov.

Odan bólek balalaryna mektep quraldaryn, kıim, balabaqsha, demalystaryn tólep berýden qashpaıtynyn aıtady.

Eske salaıyq, Dana Áteshova 12 shilde kúni burynǵy kúıeýi men onyń adamdary tártip saqshylarymen ózin úıden kúshtep qýyp shyqpaq bolǵanyn aıtty. Áteshova óziniń burynǵy kúıeýi Marat Áıtenovtiń ústinen birneshe ret shaǵymdanǵan. Ol – Shymkent qalasynyń burynǵy ákiminiń aǵasy. Sondaı-aq Dana Áteshova prezıdentten kómek suraǵan edi.

Buǵan deıin Marat Áıtenovtyń 5 táýlikke qamaýǵa alynǵany týraly jazǵan edik.