ءبىلىم
«100% جۇمىس بەرۋشىنىڭ كىناسى»: سەمەيدە بيىكتەن قۇلاعان مۇعالىمنىڭ ءىسىن تەكسەرۋ اياقتالدى
فوتو: smartnews
ەڭبەك ينسپەكتورلارى سەمەيدە شىرشانى بەزەندىرۋ كەزىندە بيىكتەن قۇلاعان مۇعالىم قۋات ايتقاليەۆتىڭ ءىسىن تەكسەرۋدى اياقتادى, دەپ حابارلايدى qandastar.kz Ulysmedia.kzسايتىنا سىلتەپ.
ەڭبەك ينسپەكتسياسى سەمەيدە شىرشانى بەزەندىرۋ كەزىندە قۇلاعان مۇعالىمنىڭ ءىسىن تەكسەرۋدى اياقتادى. تەكسەرىس كەزىندە مۇعالىمدى شىرشانى بەزەندىرۋگە مەكتەپ ديرەكتورى جىبەرگەنى انىقتالعان.
جۇمىس بەرۋشىنىڭ كىناسى 100% قۇرادى. بۇل جەردە ايتقاليەۆتىڭ (مۇعالىم) تۇك كىناسى جوق. مۇعالىمگە وسى ۋاقىتقا دەيىن جوعالتقان جالاقىنىڭ ءبارى تولەنەدى. سونداي-اق, ەگەر ەم اقىلى نەگىزدە جۇرگىزىلسە, ەمدەۋگە جۇمسالعان بارلىق شىعىندار وتەلۋى ءتيىس, – دەدى وبلىستىق مەملەكەتتىك ەڭبەك ينسپەكتسياسى دەپارتامەنتىنىڭ ءبولىم باسشىسى توقتاربەك تۇسىپباەۆ Semei TV-گە بەرگەن سۇحباتىندا.
ءىستىڭ ماتەريالدارى پوليتسياعا جىبەرىلگەن. جۇمىس بەرۋشى ەڭبەكتى قورعاۋ ەرەجەلەرىن بۇزعانى ءۇشىن جاۋاپقا تارتىلادى.
بيىكتەن قۇلاعان مۇعالىم قۋات ايتقاليەۆ №49 مەكتەپتە جۇمىس ىستەيدى. مۇعالىم سەمەيدە تۇرادى.
