جاڭالىقتار
جول اپاتىنا تۇسكەن ورالدىق وعان اكىمدىكتى كىنالاپ, 603 مىڭ تەڭگە ءوندىرىپ الدى
فوتو: pixabay.com
جول اپاتىنا تۇسكەن ورال تۇرعىنى اكىمدىكتەن كولىگىنىڭ شىعىندارىن وندىرىپ الدى, بۇل تۋرالى Stan.kz اقپارات اگەنتتىگى «موي گورود» پورتالىنا سىلتەمە جاساپ حابارلايدى.
ءىس ماتەريالدارىنا سايكەس, ابىلقايىر حان مەن سىرىم داتوۆ كوشەسى قيىلىسىنداعى جولدىڭ ساپاسى ناشار بولعاندىقتان ەر ادام جول اپاتىنا ءتۇسىپ, قالتاسىنان ءبىراز شىعىن شىعارعان.
ءسويتىپ تۇرعىن ءۇي-كوممۋنالدىق شارۋاشىلىق ءبولىمى جول ساپاسىنا قاتىستى مىندەتىن دۇرىس ورىنداماعان دەپ ەسەپتەپ, سوت ارقىلى 788 مىڭ تەڭگە اقشا ءوندىرۋدى تالاپ ەتكەن.
«سوت ءىس ماتەريالدارىن زەردەلەي كەلە, ماتەريالدىق زالالدىڭ كەلتىرىلۋ فاكتىسى اكىمشىلىك قۇقىق بۇزۋشىلىق تۋرالى ءىس ماتەريالدارىمەن راستالعانىن انىقتادى. بىراق ساراپشىنىڭ قورىتىندىسى بويىنشا, كولىكتى جوندەۋ جۇمىستارىنىڭ قۇنى 603 مىڭ تەڭگە بولعان», – دەپ حابارلادى ءباسپاسوز قىزمەتى.
وسىعان بايلانىستى سوت تالاپ ارىزدى ءىشىنارا قاناعاتتاندىردى. تۇرعىن ءۇي-كوممۋنالدىق شارۋاشىلىق ءبولىمى ەر ادامنىڭ پايداسىنا 603 مىڭ تەڭگە ماتەريالدىق شىعىندى جانە 6 037 تەڭگە مەملەكەتتىك باج سالىعىن تولەۋگە مىندەتتەلدى.
