«1066 تەڭگە قالاي جەتەدى?»: رينات زايىتوۆتىڭ سۇراعى ۆيتسە-ءمينيستردى تىعىرىققا تىرەدى

فوتو: ءماجىلىس

ءماجىلىس دەپۋتاتى رينات زايىتوۆ جەتىم بالالاردىڭ جاعدايىنا بايلانىستى ەڭبەك جانە حالىقتى الەۋمەتتىك قورعاۋ مينيسترىنە سۇراق قويدى, دەپ حابارلايدى Skifnews.kz اقپارات پورتالى Qaz365.kz سايتىنا سىلتەمە جاساپ.

ماجىلىستە مينيسترلىكتىڭ وكىلدەرى قازاقستاندا 22 مىڭ جەتىم بالا بارىن حابارلاعان.

«بيىل قانشا جەتىم بالا پاتەرمەن قامتىلادى? ناقتى ساندارمەن جاۋاپ بەرسەڭىزدەر. ويتكەنى جىل سايىن جەتىم بالالار پاتەرىنەن ايىرىلىپ قالادى. الا الماي قالادى. تەنتىرەپ ەسىكتەردى توزدىرىپ جۇرەدى. گرانتتارىڭىز بويىنشا, مۇگەدەكتىگى بار ادامدارعا 1,2 ملن تەڭگە گرانت بەرەمىز دەيسىزدەر. بىراق بەرەتىن گرانتتى 500 مىڭ تەڭگە پارا بەرمەسە تاعى جوق. وعان دا ناقتى دالەلدەرىمىز بار. سىزدەر تاراپتان ەشقانداي جاۋاپ جوق», – دەيدى دەپۋتات.

رينات زايىتوۆ وتەماقى جايلى دا ايتتى.

«ايدى اسپانعا شىعارعانداي ايعايلاپ ايتاسىزدار. 21 مىڭ تەڭگەدەن 32 مىڭ تەڭگەگە دەيىن وسىردىك دەيسىز. ماكسيمالدى تۇردە الايىنشى, ادام رەتىندە سۇرايىنشى: 32 مىڭ تەڭگە كۇنىنە شاعاتىن بولساڭ, 1066 تەڭگە بولادى. كوپبالالى اكە رەتىندە قويايىن. ەكى جاسار بالاعا كۇنىنە 1066 تەڭگە قالاي جەتەدى? ءمينيستردىڭ ورىنباسارى, كوميتەت باسشىلارى وتىرسىزدار عوي وسى جەردە», – دەپ سۇرادى رينات زايىتوۆ.

ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ولجاس انافين بۇل سۇراققا جاۋاپ بەرە المادى. كەيىن جازباشا جاۋاپ بەرۋگە ۋادە بەردى.