جاڭالىقتار
11 ايدا 987 شاعىم: اباي وبلىسى تۇرعىندارى نەگە ءجيى شاعىمدانادى?
فوتو: اشىق دەرەككوز
اباي وبلىسى بويىنشا ساۋدا جانە تۇتىنۋشىلار قۇقىعىن قورعاۋ دەپارتامەنتى 2024 جىلعى 11 ايداعى جۇمىسىنىڭ قورىتىندىسىن شىعاردى. مىڭعا جۋىق ءوتىنىش – بۇل سان ماسەلەنىڭ اۋقىمىن عانا ەمەس, سونىمەن قاتار تۇتىنۋشىلارعا 27 ميلليون تەڭگەدەن استام قاراجاتتى قايتارۋعا كومەكتەسكەن مامانداردىڭ ءتيىمدى جۇمىسىن دا كورسەتەدى, دەپ جازادى qandastar.kz
شاعىمداردىڭ باسىم كوپشىلىگى بولشەك ساۋداعا قاتىستى – 558 ءوتىنىش. سەبەپتەرى – ازىق-ت ۇلىك ەمەس تاۋارلاردى قايتارۋدان نەمەسە الماستىرۋدان باس تارتۋ, ساپاسىز تاۋارلاردى ساتۋ. ناتيجەسىندە تۇتىنۋشىلار 17 ميلليون تەڭگەدەن استام قاراجاتتى قايتارىپ الدى.
شاعىمدار سانى بويىنشا ەكىنشى ورىندا تۇرمىستىق قىزمەت كورسەتۋ سالاسى: جيھاز, تەرەزە جانە ەسىك جاساۋ جانە جوندەۋ. 260 ءوتىنىش ءتۇسىپ, تۇتىنۋشىلارعا 6,6 ميلليون تەڭگە قايتارىلدى. ەلەكتروندىق ساۋدا ماسەلەلەرى بويىنشا 89 شاعىم تىركەلىپ, ونىڭ ىشىندە الدانىپ قالعان تۇتىنۋشىلاردىڭ ەسەبىنە 1,7 ميلليون تەڭگە ءتۇستى.
سوت پروتسەستەرى جانە اكىمشىلىك شارالار
جىل ىشىندە دەپارتامەنت ماماندارى ءۇشىنشى تاراپ رەتىندە ءۇش سوت پروتسەسىنە قاتىستى. بارلىق ىستەر تۇتىنۋشىلار پايداسىنا شەشىلدى. سونىمەن قاتار, 27 اكىمشىلىك ءىس قوزعالىپ, قۇقىق بۇزۋشىلار جاۋاپقا تارتىلدى.
ازاماتتاردىڭ قۇقىعىن قورعاۋ ءۇشىن ماماندار 16 پروفيلاكتيكالىق تەكسەرۋ جۇرگىزىپ, 165 ىشكى ساۋدا نىسانىن قامتىدى. ونىڭ ىشىنەن 136 كاسىپكەر زاڭ بۇزعانى ءۇشىن جازالاندى.
«ءدال قازىر ءبىز كۇن سايىن جاڭا وتىنىشتەرمەن كەزدەسىپ جاتىرمىز. ءبىزدىڭ ماماندار تۇتىنۋشىلاردىڭ قۇقىعىن كەڭەس بەرۋدەن سوت پروتسەستەرىنە قاتىسۋعا دەيىن بارلىق مۇمكىن ادىستەرمەن قورعاۋعا دايىن», – دەدى دەپارتامەنت باسشىسى اسحات ساگيدولدين.
نەگە دەپارتامەنتكە جۇگىنۋ كەرەك?
دەپارتامەنتتىڭ جۇمىسى كۇردەلى جاعدايلاردا دا ءوز قۇقىعىڭىزدى قورعاي الاتىندىعىڭىزدى كورسەتەدى. 11 اي ىشىندە اباي وبلىسى تۇرعىندارىنا 27 ميلليون تەڭگەدەن استام قاراجات قايتارىلدى – بۇل الاياق ساتۋشىلار مەن قىزمەت كورسەتۋشىلەردىڭ قولىندا قالىپ قويعان اقشا.
ەگەر ءسىزدىڭ قۇقىعىڭىز بۇزىلسا, اباي كوشەسى, 99, سەمەي قالاسى مەكەنجايىنداعى دەپارتامەنتكە جۇگىنىڭىز. بايلانىس تەلەفونى: 8 (7222) 35-34-22.
