Jańalyqtar
11 aıda 987 shaǵym: Abaı oblysy turǵyndary nege jıi shaǵymdanady?
Foto: ashyq derekkóz
Abaı oblysy boıynsha Saýda jáne tutynýshylar quqyǵyn qorǵaý departamenti 2024 jylǵy 11 aıdaǵy jumysynyń qorytyndysyn shyǵardy. Myńǵa jýyq ótinish – bul san máseleniń aýqymyn ǵana emes, sonymen qatar tutynýshylarǵa 27 mıllıon teńgeden astam qarajatty qaıtarýǵa kómektesken mamandardyń tıimdi jumysyn da kórsetedi, dep jazady qandastar.kz
Shaǵymdardyń basym kópshiligi bólshek saýdaǵa qatysty – 558 ótinish. Sebepteri – azyq-túlik emes taýarlardy qaıtarýdan nemese almastyrýdan bas tartý, sapasyz taýarlardy satý. Nátıjesinde tutynýshylar 17 mıllıon teńgeden astam qarajatty qaıtaryp aldy.
Shaǵymdar sany boıynsha ekinshi orynda turmystyq qyzmet kórsetý salasy: jıhaz, tereze jáne esik jasaý jáne jóndeý. 260 ótinish túsip, tutynýshylarǵa 6,6 mıllıon teńge qaıtaryldy. Elektrondyq saýda máseleleri boıynsha 89 shaǵym tirkelip, onyń ishinde aldanyp qalǵan tutynýshylardyń esebine 1,7 mıllıon teńge tústi.
Sot proesteri jáne ákimshilik sharalar
Jyl ishinde departament mamandary úshinshi tarap retinde úsh sot proesine qatysty. Barlyq ister tutynýshylar paıdasyna sheshildi. Sonymen qatar, 27 ákimshilik is qozǵalyp, quqyq buzýshylar jaýapqa tartyldy.
Azamattardyń quqyǵyn qorǵaý úshin mamandar 16 profılaktıkalyq tekserý júrgizip, 165 ishki saýda nysanyn qamtydy. Onyń ishinen 136 kásipker zań buzǵany úshin jazalandy.
«Dál qazir biz kún saıyn jańa ótinishtermen kezdesip jatyrmyz. Bizdiń mamandar tutynýshylardyń quqyǵyn keńes berýden sot proesterine qatysýǵa deıin barlyq múmkin ádistermen qorǵaýǵa daıyn», – dedi Departament basshysy Ashat Sagıdoldın.
Nege Departamentke júginý kerek?
Departamenttiń jumysy kúrdeli jaǵdaılarda da óz quqyǵyńyzdy qorǵaı alatyndyǵyńyzdy kórsetedi. 11 aı ishinde Abaı oblysy turǵyndaryna 27 mıllıon teńgeden astam qarajat qaıtaryldy – bul alaıaq satýshylar men qyzmet kórsetýshilerdiń qolynda qalyp qoıǵan aqsha.
Eger sizdiń quqyǵyńyz buzylsa, Abaı kóshesi, 99, Semeı qalasy mekenjaıyndaǵy Departamentke júginińiz. Baılanys telefony: 8 (7222) 35-34-22.
