جاڭالىقتار
11 مىڭ جۇمىسشىنىڭ جالاقىسىن بەرمەگەن
كاسىپورىنداردىڭ جۇمىسشىلارعا قارىزى جارتى جىلدا 3 ملرد تەڭگەگە جۋىقتاعان.
جىل باسىنان بەرى مەملەكەتتىك ەڭبەك ينسپەكتورلارى 28,7 مىڭنان استام جۇمىسشىنىڭ قۇقىعىن قورعادى, دەپ حابارلايدى ەڭبەك جانە حالىقتى الەۋمەتتىك قورعاۋ مينيسترلىگى.
بيىلعى 1 شىلدەدەگى جاعداي بويىنشا 190 كاسىپورىن 11,2 مىڭ جۇمىسكەرگە 2,9 ملرد تەڭگەدەن استام جالاقىسىن تولەمەگەن.
«سونىمەن بىرگە ءتۇرلى ۇيىمداردا 5,6 مىڭعا جۋىق ەڭبەك قۇقىعى بۇزىلعان. جالاقى بويىنشا بەرەشەگى بار كاسىپورىنداردىڭ باسشىلارىنا ورىنداۋعا مىندەتتى 182 ۇيعارىم بەرىلدى جانە 26,7 ملن تەڭگەدەن استام سوماعا ايىپپۇل سالىندى», — دەيدى ۆەدومستۆو.
ناتيجەسىندە 9,5 مىڭنان استام جۇمىسشىنىڭ قۇقىعى قورعالىپ, 2,2 ملرد تەڭگە تولەنگەن.
بيىل مەملەكەتتىك ەڭبەك ينسپەكتورلارى 3 549 تەكسەرۋ جۇرگىزىپ, 5 607 زاڭ بۇزۋشىلىق فاكتىسىن انىقتاعان.
