Jańalyqtar
11 myń jumysshynyń jalaqysyn bermegen
Kásiporyndardyń jumysshylarǵa qaryzy jarty jylda 3 mlrd teńgege jýyqtaǵan.
Jyl basynan beri memlekettik eńbek ınspektorlary 28,7 myńnan astam jumysshynyń quqyǵyn qorǵady, dep habarlaıdy eńbek jáne halyqty áleýmettik qorǵaý mınıstrligi.
Bıylǵy 1 shildedegi jaǵdaı boıynsha 190 kásiporyn 11,2 myń jumyskerge 2,9 mlrd teńgeden astam jalaqysyn tólemegen.
«Sonymen birge túrli uıymdarda 5,6 myńǵa jýyq eńbek quqyǵy buzylǵan. Jalaqy boıynsha bereshegi bar kásiporyndardyń basshylaryna oryndaýǵa mindetti 182 uıǵarym berildi jáne 26,7 mln teńgeden astam somaǵa aıyppul salyndy», — deıdi vedomstvo.
Nátıjesinde 9,5 myńnan astam jumysshynyń quqyǵy qorǵalyp, 2,2 mlrd teńge tólengen.
Bıyl memlekettik eńbek ınspektorlary 3 549 tekserý júrgizip, 5 607 zań buzýshylyq faktisin anyqtaǵan.
