11 jastaǵy oqýshy úıde bosanǵan: Qamqorshylary qamaýǵa alyndy

AQSh-tyń Oklahoma shtatynda 33 jastaǵy Sherı Ýoker men onyń 34 jastaǵy kúıeýi Dastın 11 jasar asyrandy qyzynyń júktiligine jáne úıde bosanýyna baılanysty qamqorshylyq mindetterin oryndamaǵany úshin qamaýǵa alyndy, dep habarlaıdy Qandastar.kz

Bul jaıly Daily Mail jazdy.

Basylymnyń deregine súıensek, sábı úıde dúnıege kelgen jáne deni saý bolǵan. Ata-anasy asyrandy qyzdy bir jyldan astam ýaqyt boıy dárigerge aparmaǵan. Al tolǵaǵy bastalǵan kezde de aýrýhanaǵa júginbegen.

Okrýg prokýrorynyń kómekshisi Djanet Hatsonnyń aıtýynsha, qamqorshylyq qyzmeti men basqa da organdar jaǵdaıdan tek qyzdy bosanǵannan keıingi tekserýge jedel járdem arqyly aýrýhanaǵa jetkizgen kezde ǵana habardar bolǵan.

«Bul 11 jastaǵy qyz ekenin jáne oǵan eshqandaı medıınalyq kómek kórsetilmegenin bilgende qatty shoshydym. Onyń qasynda bolar jan da tabylmaǵan. Bul oqıǵa oǵan ómir boıǵy psıhologııalyq jaraqat ákeldi», — dedi Hatson.

Sonymen birge ol qamqorshylardyń «qyzdyń júktiligin bilmedik» degen sózderine senbeıtinin aıtty. Prokýrordyń kómekshisiniń sózinshe, qyz basqa bes balamen birge Ýokerlerden alyndy.

Qazir bılik jas ananyń balasynyń ákesin anyqtaý úshin saraptama nátıjesin kútip otyr.