الەم جاڭالىقتارى
11 جىل كىناسىز اباقتىدا وتىرعان اقجارقىن تۇرلىبايعا قاتىستى تىڭ دەرەك شىقتى
فوتو: اشىق دەرەككوز
قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆ قىتايدا ءومىر بويىنا باس بوستاندىعىنان ايىرىلعان قازاقستاندىق اقجارقىن تۇرلىبايعا قاتىستى جاعدايعا پىكىر ءبىلدىردى, دەپ حابارلايدى qandastar.kz ALASH.KZ-كە سىلتەمە جاساپ.
سمادياروۆتىڭ ايتۋىنشا, بۇل ىسكە بايلانىستى ودان ارعى جۇمىستاردى قازاقستان باس پروكۋراتۋراسى جۇرگىزەدى.
«قاجەتتى جۇمىستاردىڭ بارلىعى اتقارىلدى. ەندى بۇل ىسپەن ءارى قاراي باس پروكۋراتۋرا اينالىسادى, اقپارات الماسۋ سولاردىڭ جەلىسى بويىنشا جۇزەگە اسادى», – دەدى ول.
جۋرناليستەر اقجارقىن تۇرلىبايمەن قازاقستان ەلشىلىگىنىڭ وكىلدەرى كەزدەسكەن-كەزدەسپەگەنىن دە سۇرادى.
«بۇل – شەتەلدەگى تۇرمەلەردە وتىرعان ءبىزدىڭ ازاماتتاردى كونسۋلدىڭ جىل سايىن بارۋ تارتىبىنە سايكەس جاسالاتىن كۇندەلىكتى جۇمىس. سوندىقتان بۇل باعىتتاعى جۇمىستار جۇرگىزىلىپ جاتىر», – دەپ ءتۇسىندىردى ءسىم وكىلى.
بۇعان دەيىن باس پروكۋراتۋراعا اقجارقىن تۇرلىبايدىڭ جازاسىن قازاقستاندا وتەۋگە نيەتتى ەكەنى تۋرالى ءوتىنىش تۇسكەنى حابارلانعان.
ءساۋىر ايىندا اقجارقىن تۇرلىبايدى قازاقستانعا ەكستراديتسيالاۋ تۋرالى جەلىدەگى اقپارات تاراعان بولاتىن. الايدا بۇل مالىمەتتى باس پروكۋراتۋرا راستاعان جوق.
